21 чэрвеня 2024, Пятніца, 3:39
Падтрымайце
сайт
Сім сім,
Хартыя 97!
Рубрыкі

«Як вы мне прапануеце гэта з Вільні аплаціць?»

9
«Як вы мне прапануеце гэта з Вільні аплаціць?»

Беларуску ўпершыню асудзілі праз Viber.

У судзе Барысаўскага раёна 9 лютага разгледзелі справу Аксаны Хіневіч - маці былога палітвязня Анатоля Хіневіча.

Яе абвінавацілі ў атрыманні «замежнай дапамогі» з ініцыятывы INeedHelpBY і аштрафавалі.

Пасля затрымання ў студзені жанчына з'ехала ў Літву, і працэс адбываўся ў незвычайным фармаце - праз Viber. Гэта першы такі выпадак за апошні час, вядомы праваабаронцам, піша «Вясна».

Аксану затрымалі 23 студзеня падчас аблавы сілавікоў на былых палітвязняў і іхніх сваякоў. На наступны дзень жанчыну асудзілі за непадпарадкаванне міліцыянту і аштрафавалі на 400 рублёў (10 базавых адзінак).

Крыху пазней на яе склалі яшчэ адзін пратакол - паводле ч. 2 арт. 24.15 КоАП (Выкарыстанне замежнай бязвыплатнай дапамогі для ажыццяўлення тэрарыстычнай і іншай экстрэмісцкай дзейнасці або іншых дзеянняў, забароненых заканадаўствам). Да гэтага часу Хіневіч з'ехала ў Літву разам з сынам, і пратакол для азнаямлення ёй даслалі па Viber.

Як вынікае з дакумента, Хіневіч звязалася з ініцыятывай INeedHelpBY, якую КДБ абвясціў «экстрэмісцкім фармаваннем», і з лютага 2022-га па красавік 2023 года «атрымала і выкарыстоўвала замежную бязвыплатную дапамогу ў выглядзе таварна-матэрыяльных каштоўнасцяў, набытых у інтэрнэт-краме «Еўраопт» на 2854 рублі 45 капеек.

Працэс праходзіў 9 лютага па відэасувязі праз Viber. На пытанне суддзі жанчына распавяла, што знаходзіцца ў Вільні ў свайго сына, а часова ці не - залежыць ад таго, «як скончацца працэсы».

Суддзя Святлана Баранава прызначыла Аксане Хіневіч штраф на 20 базавых адзінак (800 рублёў) і пастанавіла выплаціць кампенсацыю сумай атрыманай дапамогі. Рэквізіты для аплаты ёй таксама паабяцалі даслаць па Viber.

«А як вы мне прапануеце гэта з Вільні аплаціць? Каб гэта была зноў гуманітарная дапамога Беларусі з замежнага рахунку?» - спытала жанчына, але адказу так і не атрымала.

Нагадаем, 23-24 студзеня ў Беларусі прайшоў масавы рэйд сілавікоў па былых палітвязнях і іх сямейніках.

Напісаць каментар 9

Таксама сачыце за акаўнтамі Charter97.org у сацыяльных сетках