Кіраўнік спецпадраздзялення ГУВ расказаў, як Буданаў узяў у палон 19 расейцаў

Кіраўнік украінскай вайсковай выведкі асабіста ўдзельнічаў у некалькіх аперацыях.

Кіраўнік Галоўнай управы выведкі Міністэрства абароны Украіны (ГУВ МАУ) Кірыл Буданаў удзельнічаў у некалькіх аперацыях разам са спецназаўцамі. Падчас адной з іх яму ўдалося ўзяць у палон 19 расейцаў. Кіраўнік спецпадраздзялення «Цімура» Цімур у інтэрв'ю «Украінскай праўдзе» распавёў, як яму гэта ўдалося.

Паводле ягоных слоў, для спецназаўцаў удзел Буданава ў аперацыях - «максімальны стрэс». Яны імкнуцца абыходзіць яго фізічную прысутнасць, каб ён не прыязджаў у квадрат, дзе яны знаходзяцца, паколькі «гэта вельмі высокая рызыка».

«Але ў нас камандзір баявы, і яму хочацца быць побач на нашых аперацыях. Таму было некалькі аперацый, дзе Кірыл Аляксеевіч ішоў побач з намі», - сказаў Цімур.

Ён не расказаў, у якіх менавіта аперацыях Буданаў удзельнічаў з меркаванняў яго бяспекі. Аднак гэта было і на зямлі, і на вадзе.

Кірыл Буданаў узяў у палон 19 чалавек

Са слоў Цімура, гэта была супольная аперацыя з іншымі спецпадраздзяленнямі. Тады акупанты выйшлі на сувязь з-за таго, што ўзялі ў палон ўкраінскага вайскоўца, яны пачалі дыктаваць умовы далейшых дзеянняў спецпадраздзяленняў. У гэты час Буданаў узяў рацыю і прадставіўся, хто ён.

«Думаю, гэта таксама на іх паўплывала. І спакойна растлумачыў, што менавіта мы будзем казаць, як усё будзе адбывацца далей і з якой хуткасцю будзе адбывацца іх здача ў палон. У іх тады была такая сітуацыя, што ім сапраўды было лепш здацца», - растлумачыў Цімур.

Нагадаем, 8 лютага кіраўнік ГУР МАУ Кірыл Буданаў атрымаў годнасць Героя Украіны.