Берасцейка замовіла для мамы букет з грошай

Замест кветак у ім 1600 беларускіх рублёў.

Жыхарка Берасця Анастасія, якая робіць букеты, размясціла ў сваім акаўнце ў TikTok незвычайную замову: яе папрасілі зрабіць букет з грошай. Замест кветак скарыстаныя беларускія 5-рублёвыя банкноты і цукеркі, піша Onliner.by.

«Многія падумалі, што гэта падарунак ад хлопца дзяўчыне на 14 лютага. Нехта пісаў, што дзяўчыне пашанцавала, а нехта крытыкаваў і выказваў меркаванне, што яна з ім толькі праз грошы. Але не, гэты букет замовіла дачка для сваёй мамы», - патлумачыла Onliner Анастасія. Яна сказала, што пасля публікацыі роліка ў TikTok ёй напісалі пяць мужчын з запытам на такую ж замову, але, на жаль, яны з Менска, а Настасся працуе ў Берасці.

Усяго на выраб такога букета Анастасіі спатрэбілася блізу шасці гадзін. Шмат часу давялося выдаткаваць на пошук 5-рублёвых купюр у касах банкаў і кавярняў, а таксама на пошук «Сталічных» цукерак.

«Я і раней рабіла букеты з грошай, але такой замовы яшчэ не было. Бывала, што замест кветак выкарыстоўвалі 300 рублёў, максімум 500 рублёў. Але не 1600», - адзначыла Анастасія.