Эстонія заклікала ЕЗ канфіскаваць расейскія актывы на 150 млрд еўраў да канца года

ЕЗ і краіны G7 замарозілі больш за 250 млрд еўраў актываў расейскага Цэнтрабанка пасля пачатку вайны ва Украіне.

Эстонія намагае на тым, каб Еўрапейскі Звяз канфіскаваў больш за 150 млрд еўраў замарожаных расейскіх актываў да канца года. Як заявіў канцлер эстонскага МЗС Ёнатан Усевіёў, якога цытуе Bloomberg, гэта лепш зрабіць да выбараў прэзідэнта ЗША.

Лідары ЕЗ трывожна адрэагавалі на перадвыбарныя заявы Дональда Трампа наконт выхаду ЗША з НАТА. «Вельмі важна, каб актывы былі канфіскаваныя да канца года ці, па магчымасці, да выбараў у ЗША. Калі мы занадта доўга будзем чакаць, можа быць занадта позна», - мяркуе Усевіёў.

ЕЗ і краіны G7 замарозілі больш за 250 млрд еўраў актываў расейскага Цэнтрабанка пасля пачатку вайны ва Украіне. Большасць актываў знаходзяцца ў Еўропе на клірынгавай пляцоўцы Euroclear у Бельгіі. Тут яны прынеслі блізу 4,4 млрд еўраў прыбытку ў 2023 годзе.

Эстонія ўжо працуе над уласным заканадаўствам, у рамках якога ўлады краіны ў канчатковым выніку змогуць канфіскоўваць усе расейскія актывы, замарожаныя ў краіне.

Усевіёў заявіў, што вайна ва Украіне дасягнула «плато ў вайсковым і палітычным сэнсе», што прымушае прэзідэнта Расеі Уладзіміра Пуціна верыць, што час на ягоным баку.

На думку Службы замежнай выведкі Эстоніі, Расея, імаверна, будзе выкарыстоўваць сваю перавагу ў боепрыпасах і можа акупаваць больш тэрыторыі Украіны, калі Кіеву не будзе нададзеная крытычна важная дапамога.

Напярэдадні, 12 лютага, Еўразвяз паведаміў, як будзе ўжываць абмежавальныя захады ў дачыненні да расейскага Цэнтрабанка. «Прынамсі, Еўрапейская рада пастанавіла, што цэнтральныя дэпазітарыі, якія захоўваюць актывы Цэнтральнага банка Расеі на суму, большую за 1 мільён еўраў ($1,1 мільёна), павінны асобна ўлічваць надзвычайныя рэшткі грашовых сродкаў, якія назапашваюцца ў сувязі з абмежавальнымі захадамі ЕЗ, і асобна захоўваць адпаведныя даходы», - гаворыцца ў паведамленні.