Беларус спрабаваў правезці праз мяжу без дэкларавання $70 тысяч

Грошы канфіскавалі.

Купля аўтамабіля ў Еўропе - звычайная справа для многіх беларусаў. Але ёсць нюанс, пра які многія забываюцца: буйныя сумы трэба дэклараваць. Ну а якімі могуць быць наступствы, калі гэтага не зрабіць, дэманструе нядаўні выпадак, піша "Онлайнер".

У снежні 2023 года жыхар Берасця выязджаў на аўтамабілі ў якасці кіроўцы з Беларусі ў Польшчу праз РПТА “Варшаўскі мост”. Як вынікае з матэрыялаў справы, распачатая супраць яго, мужчына наўмысна схаваў у асабістых рэчах і не задэклараваў грошы сумай звыш 70 тысяч даляраў ЗША.

- Абвінавачаны атрымаў грошы ад знаёмага ў Рэспубліцы Беларусь і павінен быў даставіць іх у адну з краін Еўрапейскага звязу для набыцця аўтамабіля, - распавялі падрабязнасці ў пракуратуры Берасцейскай вобласці.

Грошы былі знойдзеныя і канфіскаваны супрацоўнікамі Берасцейскай мытні. Зараз жа Берасцейская транспартная пракуратура накіравала ў суд крымінальную справу ў дачыненні да гэтага грамадзяніна - яму інкрымінаваны замах на незаконнае перамяшчэнне праз мытную мяжу Еўразійскага эканамічнага саюза гатоўкі у вялікай суме. Яго дзеянні кваліфікаваны паводле ч. 1 арт. 14, ч.2 арт. 228 Крымінальнага кодэкса.

У пракуратуры Берасця нагадалі, што, паводле арт. 260 Мытнага кодэкса Еўразійскага эканамічнага саюза, мытнаму дэклараванню падлягаюць тавары для асабістага карыстання, у тым ліку гатоўка і дарожныя чэкі, што перамяшчаюцца фізічнымі асобамі праз мытню ЕАЭС, калі іх агульная сума перавышае суму, эквівалентную 10 тысячам даляраў ЗША. За парушэнне мытнага заканадаўства ўстаноўленая адміністрацыйная і крымінальная адказнасць.

Паводле арт. 46-1 Крымінальнага кодэкса Рэспублікі Беларусь незаконна перамешчаная гатоўка ў суме, якая перавышае 10 тысяч даляраў ЗША, падлягае канфіскацыі ў даход дзяржавы як прадмет злачынства.