FT: ЕЗ збірае $1,5 мільярда на закупку набояў для Украіны

Ініцыятарам стала Чэхія.

Краіны Еўрапейскага звязу спрабуюць сабраць 1,5 мільярда даляраў у якасці экстранага фінансавання, каб забяспечыць Украіну артылерыйскімі набоямі з-за мяжы для ўмацавання лініі фронту супраць Расеі.

Пра гэта паведамляе Financial Times.

Ініцыятарам апошняй меры ў закупцы боепрыпасаў за межамі ЕЗ выступае Чэхія, каб кампенсаваць тупіковую сітуацыю ў Кангрэсе ў дачыненні да дапамогі ЗША і затрымак у еўрапейскай вытворчасці.

Прага ўзяла на сябе ініцыятыву, пакуль еўрапейскія сталіцы спрачаюцца аб падаўжэнні асноўнага механізму ваеннай падтрымкі Кіева з боку ЕЗ.

Афіцыйныя асобы, знаёмыя з ходам абмеркаванняў, кажуць, што краіне патрэбныя еўрапейскія партнёры, каб дапамагчы вылучыць 1,5 млрд даляраў на закуп боепрыпасаў, якую Прага арганізуе з таго часу, як Расея пачала поўнамаштабнае ўварванне ў лютым 2022 года.

«Чэхі прарабілі ўсю працу, але ім патрэбныя грошы ад іншых», - сказаў чалавек, дасведчаны ў гэтай ініцыятыве.

Некаторыя чальцы ЕЗ ужо ўнеслі свой уклад, гавораць чыноўнікі, знаёмыя з чэшскай схемай.

Амбасадары ЕЗ не змаглі дасягнуць пагаднення аб закупцы боепрыпасаў за межамі блока на сустрэчы ў Брусэлі ў сераду і паставілі мэту ўзгадніць правілы новага ўлівання капіталу да саміту лідараў ЕЗ 21 сакавіка.

Нямеччына намагае на тым, каб яе ўмоўны ўзнос у памеры прыкладна 1,25 млрд еўра быў зменшаны, каб адбіць яе буйную двухбаковую ваенную дапамогу Украіне, якая ў гэтым годзе складзе 7 млрд еўраў.

Францыя і Грэцыя намагаюць на тым, што пашыраны EPF павінен закупляць зброю і боепрыпасы толькі ў вытворцаў ЕЗ і Нарвэгіі, што не дазволіць яму фінансаваць чэшскі план ці боепрыпасы з ЗША.

Дэфіцыт набояў

Украінскія абаронцы адчуваюць дэфіцыт артылерыйскіх набояў, што наўпрост уплывае на сітуацыю на фронце. Нядаўна ўкраінскім абаронцам давялося адступіць з Аўдзееўкі на фоне вельмі складанай сітуацыі вакол горада.

Пасля гэтага міністр замежных спраў Украіны Дзмітрый Кулеба заявіў, што Кіеў не страціў бы Аўдзееўку, калі б саюзнікі своечасова перадалі артылерыйскія набоі.