У 2023 годзе кантрабанда беларускіх цыгарэт у Польшчу павялічылася ў 12 разоў

З 500 тысяч да 6 мільёнаў даляраў.

У 2023 годзе кошт выяўленай кантрабанды беларускіх цыгарэт у Польшчу павялічыўся ў 12 разоў - з 2 да 24 млн злотых (з 500 тысяч да 6 млн даляраў), паведаміла выданне Rzeczpospolita са спасылкай на Памежную ахову краіны.

Адзначаецца, што беларускія цыгарэты польскія памежнікі выяўляюць у чыгуначным і грузавым аўтамабільным транспарце, у «грузах драўніны, вугалю, солі, у ахоўных пакрыццях вагонаў-цыстэрнаў».

Выданне паведамляе, што некалькі дзён таму ў цягніку, які рухаўся з Беларусі, супрацоўнікамі Падляшскага памежнай управы знойдзена 4 тысяч пачкаў цыгарэт у вагонах з вуглём з Казахстана.

Пры гэтым кошт канфіскаваных кантрабандных беларускіх тавараў вырас з 5,8 да 30 млн злотых, што «ўнесла істотны ўклад у павелічэнне агульнага кошту канфіскаванай на польскай мяжы кантрабанды з 216 да 435 млн злотых».

Кантрабанда на мяжы з Украінай, Беларуссю і Расеяй вырасла за год з 28 да амаль 50 млн злотых, такім чынам, каля 60% гэтай сумы прыпадае менавіта на Беларусь.

«Тыя тавары, якія ўрад абкладае падаткам, пастаўляюцца злачыннымі групоўкамі. А паколькі ў Беларусі такія групы часткова санкцыянаваныя ўладамі, нядзіўна, што маштабы кантрабанды адтуль у Польшчу растуць», - адзначыў прэзідэнт Цэнтра рынкавых даследаванняў імя Адама Сміта Анджэй Садоўскі.

13 лютага Нацыянальная падатковая адміністрацыя Польшчы паведаміла аб затрыманні ў Падляскім ваяводстве партыі кантрабандных беларускіх цыгарэт - усяго 400 тысяч пачкаў.

Цыгарэты перавозіў 41-гадовы грамадзянін Беларусі на грузавіку з літоўскай рэгістрацыяй. Адзначалася, што згодна з дакументамі ў прычэпе павінны былі знаходзіцца «элементы драўляных дамоў». «Калі б канфіскаваныя цыгарэты былі прададзеныя [у Польшчы], дзяржаўны бюджэт страціў бы больш за 10 млн злотых», - гаворыцца ў паведамленні.