УСУ адбілі пазіцыі каля Аўдзееўкі і ўзялі ў палон групу расейцаў

Сітуацыя на гэтым адцінку фронту змянілася.

Узброеныя сілы Украіны адбілі некалькі пазіцый на Аўдзееўскім і Мар'інскім кірунках. Акрамя гэтага, украінскія байцы ўзялі ў палон больш за дзесяць расейскіх вайскоўцаў.

Пра гэта паведаміў спікер аператыўна-стратэгічнай групоўкі войскаў "Таўрыя" Дзмітрый Ліхавій.

Ён адзначыў, што цяпер самай гарачай мясцінай з'яўляецца Мар'інскі кірунак. За дзен акупанты пры падтрымцы авіяцыі 31 раз спрабавалі прарваць абарону ўкраінскіх байцоў у раёнах населеных пунктаў Новаміхайлаўка і Перамога Данецкай вобласці.

Таксама горача на Аўдзееўскім кірунку, дзе 21 лютага УСУ адбілі сем нападаў УС РФ у раёнах сёлаў Арлоўка, Севернае, Першамайскае і Невельскае. У цэлым на Мар'інскі і Аўдзееўскі кірунак прыпадае найбольшая колькасць авіяцыйных, артылерыйскіх удараў і атак дронаў-камікадзэ.

"І на Аўдзееўскім, і на Мар'інскім кірунку нашы ваяры ўчора аднавілі па некалькі пазіцый, і менавіта на Аўдзееўскім кірунку нашым вайскоўцам здаліся або былі ўзяты ў палон больш за дзясятак расейскіх акупантаў", — паведаміў ён.

Дзмітрый Ліхавій распавёў, што за чатыры месяцы аперацый у Аўдзееўцы агульныя страты УС РФ склалі больш за 47 тысяч вайскоўцаў. Пасля такіх страт патрэбная перагрупоўка, аднак вораг мае пэўныя рэзервы. Акупанты падцягваюць новыя рэзервы і спрабуюць штурмаваць пры падтрымцы авіяцыі ў кірункі Ластаўчына і суседніх населеных пунктаў.

Затое УСУ умацоўваюць эшаланаваную абарону, узмацняюцца дадатковымі падраздзяленнямі, ствараюць новыя агнявыя пазіцыі. Са слоў Ліхавія, ідуць складаныя баі. Украінскія байцы аднаўляюць пазіцыі, расейцы трапляюць у палон, што сведчыць аб наяўнасці блізкага баявога сутыкнення.

Ён дадаў, што акупанты спрабуюць наступаць, але не маюць дастаткова рэсурсаў для гэтага, аднак нягледзячы на гэта акупанты выкарыстоўваюць "іншыя" войскі, чым тыя, якія ўдзельнічалі ў наступленні на Аўдзееўку.