Да +14℃: якім будзе надвор'е ў Беларусі ў апошнія дні зімы

Сіноптыкі парадавалі прагнозам.

Канец лютага і пачатак сакавіка пройдуць пад знакам адлігі, сярэдняя тэмпература перавысіць норму на 6–8 ºС, абыдзецца без істотных ападкаў.

Такі прагноз зрабіў сіноптык Дзмітры Рабаў.

Пераважаць стане антыцыкланальны характар надвор'я: прасцей кажучы, у большасці раёнаў будзе сярэдняя цеплыня, а скрозь аблокі нарэшце пачне прабівацца сонца.

У пачатку тыдня тэрыторыя Беларусі будзе знаходзіцца ў зоне ўплыву малаактыўнага атмасфернага фронту з захаду Еўропы, які прывядзе да невялікіх кароткачасовых дажджоў.

Уначы будзе ад +1°C на ўсходзе да +8°C на паўднёвым захадзе. Удзень у панядзелак, 26 лютага, чакаецца ад +3°C на ўсходзе да веснавых +14°C на паўднёвым захадзе.

Пасля пахмурнага панядзелка надвор'е пачне паляпшацца. Уначы, зрэшты, на ўсходзе яшчэ можа быць слабы мароз (ад -1°C, максімум жа па краіне - да +6°C на захадзе). А вось ўдзень будзе цяплець: у аўторак – +6°C… +12°C, у сераду – +5°C… +14°C.

У другой палове тыдня беларусаў чакае пераменная воблачнасць без ападкаў. Але тэмпературныя максімумы ўжо не такія вялікія. Уначы будзе -1°C...+5°C. Удзень у чацвер - +5 ... +10°C, у пятніцу - да +5°C.

У наступныя выходныя папярэдне будзе воблачна з праясненнямі. У большасці раёнаў абыдзецца без ападкаў. Уначы тэмпература ўпадзе ад -3°C на ўсходзе, максімум - да +3°C на захадзе. У сярэдзіне дня ў суботу - +6°C... +9°C, у нядзелю - да +8°C.