Борыс Джонсан мяркуе, што Украіна верне Крым

Паводле ягоных слоў, Пуцін там вельмі ўразлівы.

Экс-прэм'ер Вялікай Брытаніі Борыс Джонсан мяркуе, што Украіна зможа лёгка забраць назад часова акупаваны Крым, бо расейскі дыктатар Уладзімір Пуцін там "вельмі ўразлівы". Такое меркаванне ён выказаў у інтэрвію "Еўрапейскай праўдзе".

«Відавочна, даўней усё думалі, што Пуцін ніколі не аддасць Крым. Маўляў, не варта нават спрабаваць. Таму думалі: паспрабуем дапамагчы Украіне адваяваць сухаземны мост. Але цяпер людзі кажуць сабе: па-першае, гэта магчыма! Вярнуць Крым рэальна», — сказаў Джонсан.

Па-другое, «Пуцін вельмі ўразлівы ў Крыме», дадаў ён.

«І калі вы паглядзіце на інфраструктуру, лагістыку, там ёсць вялікія магчымасці для УСУ. Таму я пагаджаюся: сапраўды адбыліся змены ў тым, як людзі думаюць пра Крым», — сказаў экс-прэм'ер Брытаніі.

Ён адзначыў, што калі Украіны будзе мець больш набояў вялікай далёкасці, больш HIMARS, ATACMS, Storm Shadow і ўсяго, што трэба УСУ, "то Крыма будзе мець вельмі цікавыя перспектывы".