У Менску за БЧБ-сцяг у акне затрымлівалі супрацоўніцу ўстановы адукацыі
7- 29.02.2024, 12:20
- 8,108
![У Менску за БЧБ-сцяг у акне затрымлівалі супрацоўніцу ўстановы адукацыі](https://i.c97.org/ai/433966/aux-head-1629472149-flag.gif)
Жанчыну асудзілі на 14 дзён адміністрацыйнага арышту.
Жыхарку Менска, супрацоўніцу адной з устаноў адукацыі, затрымалі ў яе кватэры і абвінавацілі ў вывешванні бел-чырвона-белага сцяга на акне, піша zerkalo.io. Суд адправіў яе пад адміністрацыйны арышт, гаворыцца ў пастанове.
Як сказана ў пратаколе паводле частцы 1 артыкула 24.23 КоАП, мянчанка 14 студзеня а 21.43 "публічна дэманстравала з акна дома ... бел-чырвона-белы сцяг, што стала даступна неабмежаванаму колу асоб".
Тым самым, паводле версіі міліцыі, жанчына "правяла масавае мерапрыемства — пікетаванне, на правядзенне якога не быў атрыманы адпаведны дазвол Менгарвыканкама". У справе маецца пратакол агляду "вокнаў і кватэры", падчас якога быў знойдзены сцяг.
На судзе, які адбыўся чамусьці праз месяц - 15 лютага, мянчанка прызнала віну і сказала, што павесіла бел-чырвона-белы сцяг на акно ў сваім пакоі знутры.
Суд прызнаў яе вінаватай у несанкцыянаваным пікетаванні і прызначыў ёй 14 дзён адміністрацыйнага арышту.
Адзначым, невядома, ці павесіла жанчына сцяг самастойна. З гісторый палітвязняў вядомыя выпадкі, калі сілавікі, каб мець нагоду арыштаваць патрэбнага ім чалавека і адправіць на арышт, прыходзілі дадому, самі вешалі сцяг, рабілі фота — і гэта потым рабілася матэрыяламі адміністрацыйнай справы. Падобныя пратаколы могуць ісці ў ход і ў тых выпадках, калі людзі ўжо знаходзяцца на Акрэсціна, але сілавікі хочуць пакінуць іх на яшчэ адзін "тэрмін" і арганізуюць новыя суды.