Банкі Беларусі ўводзяць валютныя змены

Падборка навін.

Некалькі банкаў увялі валютныя змены. «Сбер Банк», да прыкладу, запусціў прапанову для ўкладчыкаў - перавесці тэрміновыя безадзыўныя дэпазіты ў далярах і еўрах у беларускія і расейскія рублі або ў юані, паведамляе «Зеркало».

«Альфа Банк» з 29 лютага ўвёў змяненне па пераводах з карткі на картку па нумары карткі ў Беларусі і за мяжу - для іх павялічаны дзённы ліміт да 15 пераводаў на максімальную суму 5000 рублёў (даляраў, еўраў або расейскіх рублёў у эквіваленце).

Нагадаем, раней «Альфа-Банк» абвясціў, што з 1 сакавіка будзе спаганяць плату за захоўванне даляраў і еўраў на рахунках, калі іх сума перавышае эквівалентна 160 тысяч рублёў. Першапачаткова платную паслугу збіраліся ўвесці з 1 лютага.

«Сбер Банк» запусціў прапанову для ўкладчыкаў - перавесці тэрміновыя безадзыўныя дэпазіты «Захоўвай» і «Прэміум даверны» у далярах або еўрах (адкрытыя да 1 лютага 2024 года) у іншую валюту - беларускія або расейскія рублі, а таксама ў кітайскія юані. «Пры гэтым вяртанне дэпазіту ажыццяўляецца без пераліку адсоткаў», - удакладняе фінустанова.

«Банк ЗГБ» з 1 сакавіка знізіць да 0,01% гадавых стаўку на рэшту сродкаў на рахунках у далярах і расейскіх рублях для ўладальнікаў картак тарыфных планаў «Прывілей» і «Прывілей Лайт». «Умовы будуць датычныя ў тым ліку да раней укладзеных дамоваў. На рэшту сродкаў на рахунках у беларускіх рублях для прэміяльных кліентаў працягнуць налічвацца 3% гадавых», - паведаміў банк.

Таксама Банк ВТБ абвясціў, што ўстанавіў выгодны курс абмену даляраў, еўраў і расейскіх рублёў для карыстальнікаў інтэрнэт-банка і VTB mBank. «Для ўладальнікаў картак MORE і прэміяльных картак опцыя абмену валюты ўстанаўліваецца аўтаматычна. Па астатніх картках палепшаны курс актывуецца пры аб'ёме транзакцый ад 500 беларускіх рублёў цягам месяца», - удакладняе фінустанова.

«Банк БелЗЭБ» раней прыпыніў падпісанне новых і прадаўжэнне ўкладзеных раней безадзыўных дэпазітаў у еўрах з тэрмінамі размяшчэння 35 дзён і 3 месяцы.