Еўрапарламент прагаласаваў за «план перамогі Украіны»

Еўрадэпутаты таксама просяць узмацніць жорсткасць санкцыйнага рэжыму ў дачыненні да рэжыму Лукашэнкі.

Усе краіны Еўрапейскага Звязу і іх хаўруснікі ў NATO павінны штогод вылучаць не менш як 0,25 адсотка свайго ВУП на ваенную падтрымку Украіны, мяркуюць у Еўрапейскім парламенце. Гэтай краіне неабходна вылучыць усё, што ёй патрэбна для адбіцця расейскай агрэсіі, заявілі дэпутаты. За адпаведную рэзалюцыю ў чацвер, 29 лютага, у Страсбургу прагаласаваў 451 еўрапарламентарый, 46 чалавек выступілі супраць, 49 – устрымаліся, паведамляе DW.

У тэксце рэзалюцыі ўказваецца на вялікае разыходжанне ва ўзроўні ваеннай падтрымкі, што робіцца Кіеву краінамі ЕЗ, у адсоткавых адносінах да іх ВУП. Парламентарыі заклікалі найбуйнейшыя дзяржавы-чальцы Еўразвязу з вялікім абаронна-прамысловым патэнцыялам тэрмінова павялічыць дапамогу УСУ. Еўрадэпутаты перакананыя, што ў адносінах да ваеннай дапамогі Украіне не павінна быць ніякіх самаабмежаванняў.

Яны заклікалі інвеставаць у еўрапейскую абаронную прамысловасць для істотнага павелічэння вытворчасці, каб задаволіць патрэбы УСУ і папоўніць зменшаныя запасы краінаў Еўразвязу. «Украіна асабліва мае патрэбу ў сучасных сістэмах СПА, такіх ракетах вялікай далёкасці, як TAURUS, Storm Shadow / SCALP і іншых, сучасных баявых самалётах, розных тыпах артылерыі і боепрыпасаў (сярод іншага, 155 мм), беспілотніках і зброі для барацьбы з імі», – падкрэсліваецца ў тэксце.

У сувязі з дэфіцытам боепрыпасаў на полі бою ва Украіне Еўрапарламент заклікаў да павелічэння Еўрапейскага фонду міру і ягонага выкарыстання для супольных набыткаў для УСУ на сусветным рынку. На думку дэпутатаў, урадам краінаў ЕЗ варта неадкладна пачаць дыялог з вытворцамі ўзбраенняў, каб гарантаваць, што вытворчасць і пастаўка, сярод іншага, боепрыпасаў і ракетаў для Украіны будуць больш прыярытэтнымі за іншыя замовы. «Недастатковая і несвоечасовая пастаўка зброі і боепрыпасаў рызыкуе падарваць намаганні, зробленыя да гэтага часу», – заявілі ў Страсбургу.

Парламентарыі нагадалі, што галоўная мэта Украіны – перамога ў вайне супраць РФ, што прадугледжвае выцясненне ўсіх сілаў Расеі, яе прыхільнікаў і хаўруснікаў з міжнародна прызнанай тэрыторыі Украіны. «Гэтая мэта можа быць дасягнутая толькі шляхам бесперапыннага, устойлівага і няўхільнага росту паставак Украіне ўсіх без выключэння відаў звычайных узбраенняў», – гаворыцца ў рэзалюцыі.

На думку Еўрапарламента, зыход гэтай вайны і пазіцыя ў адносінах да яе міжнароднай супольнасці маюць вызначальную ролю ва ўплыве на дзеянні ў будучыні іншых аўтарытарных рэжымаў.

Больш санкцый супраць РФ і Беларусі

Еўрадэпутаты заклікалі Еўразвяз узмацніць палітыку санкцый супраць Расеі і Беларусі, адсочваючы, пераглядаючы і павышаючы яе эфектыўнасць, а таксама распрацаваць механізм прадухілення абыходу абмежавальных захадаў. Санкцыі супраць Беларусі павінны быць прыведзеныя ў поўную адпаведнасць з санкцыямі супраць Расеі, мяркуюць яны.

Што датычыцца канкрэтных захадаў, то на думку парламентарыяў, неабходна ўвесці эмбарга на расейскі ўран і металургічную прадукцыю, а таксама забараніць супрацоўніцтва з расейскім ядзерным сектарам, сярод іншага з «Расатамам». У якасці яшчэ аднаго захаду яны назвалі поўнае эмбарга на расейскую сельскагаспадарчую і рыбную прадукцыю, выкапнёвае паліва і ЗПГ, а таксама далейшае зніжэнне столі коштаў нафты ў каардынацыі з партнёрамі G7.

Канфіскацыя замарожаных актываў РФ

Еўрапарламент настойвае на неадкладнасці стварэння надзейнага прававога рэжыму, які дазволіў бы канфіскаваць замарожаныя ў Еўразвязе расейскія дзяржаўныя актывы і выкарыстоўваць іх для ўхілення наступстваў агрэсіі РФ супраць Украіны. Апроч гэтага Масква абавязаная будзе выплаціць Кіеву пасляваенныя рэпарацый, патрабуюць дэпутаты.

Еўразвязу і ягоным краінам трэба распрацаваць стратэгію супрацьдзеяння гібрыдным пагрозам і ўмяшанню Расеі ў палітычныя, выбарчыя і іншыя дэмакратычныя працэсы ва Украіне і ў ЕЗ, заявіў Еўрапарламент. Ён асудзіў забойства Максіма Кузьмінава ў Гішпаніі і заклікаў краіны ЕЗ катэгарычна рэагаваць на такія дзеянні расейскіх спецслужбаў і ўзмацніць супрацоўніцтва ў галіне контрвыведкі.

«Формула перамогі» Украіны

Дыскусія датычна гэтай рэзалюцыі прайшла ў Страсбургу яшчэ 6 лютага. Тады сябры ўсіх уплывовых палітычных групаў выказалі перакананне, што, нягледзячы на беспрэцэдэнтную салідарнасць з Кіевам, ЕЗ робіць недастаткова. На думку парламенцкага спецдакладніка пра Расею Андруса Кубілюса, такі стан справаў тлумачыцца тым, што аб'ёмы еўрапейскай дапамогі залежаць ад «індывідуальных добраахвотных пастановаў кожнай краіны-чальца ЕЗ». «Нам патрэбны план перамогі Украіны, які пакрые ўсе ваенныя патрэбы Украіны, а не толькі боепрыпасы», – заявіў ён. Гэты план павінен грунтавацца на абавязальніцтве кожнай краіны Еўразвязу прапанаваць Украіне ваенную дапамогу аб'ёмам не меншым як 0,25 адсотка ад нацыянальнага ВУП.