Польшча набывае ў ЗША самую сучасную сістэму кіравання СПА і ПРА на $2,5 млрд
1- 29.02.2024, 21:35
- 4,586
![Польшча набывае ў ЗША самую сучасную сістэму кіравання СПА і ПРА на $2,5 млрд](https://i.c97.org/ai/585693/aux-head-1709231702-20240101_linski_360.jpg)
Кантракт будзе рэалізаваны цягам 2024–2031 гадоў.
Міністр абароны Польшчы Уладзіслаў Касіняк-Камыш 29 лютага падпісаў у чацвер кантракт на стварэнне інтэграванай сістэмы кіравання супрацьпаветранай і супрацьракетнай абаронай з урадам ЗША.
Пра гэта паведамляе PAP.
Кантракт паміж Польшчай і ЗША коштам прыкладна 2,53 мільярда даляраў будзе рэалізаваны цягам 2024–2031 гадоў. Ён прадугледжвае набыццё інтэграванай сістэмы кіравання супрацьпаветранай і супрацьракетнай абаронай IBCS.
У пакет уваходзяць каманднае і камунікацыйнае абсталяванне, неабходнае для шасці батарэй праграмы супрацьпаветранай абароны WISŁA і 23 камплектаў праграмы супрацьракетнай абароны NAREW.
Пасля падпісання кантракта Касіняк-Камыш падкрэсліў, што праграмы WISŁA і NAREW будуць працаваць на самай сучаснай у свеце сістэме кіравання. «Польшча стане другой краінай пасля ЗША, якая будзе мець самую сучасную ў свеце інтэграваную сістэму кіравання», – падкрэсліў ён.
Разам з Вялікай Брытаніяй Злучаныя Штаты сталі галоўнай крыніцай набыцця Польшчай сістэмаў супрацьпаветранай і супрацьракетнай абароны.
Мінулай восенню Дзяржаўны дэпартамент ЗША ўхваліў патэнцыйны продаж Польшчы інтэграванай сістэмы баявога кіравання супрацьпаветранай і супрацьракетнай абароны арыентавальным коштам 4 мільярды даляраў.
А ў лютым ЗША далі зялёнае святло на продаж Польшчы сучасных сістэмаў радыёлакацыі, выведкі паветранай прасторы і наземнай радыёлакацыі разам з элементамі лагістыкі коштам 1,2 мільярда даляраў.