Хто сабатуе магчымую мабілізацыю ў Беларусі?

Некалькі слоў пра праверку цывільнай тэхнікі, на якую вайскоўцы прэтэндуюць у выпадку вайны.

У Беларусі з восені 2021 года праводзіцца праверка транспарту, які падлягае перадачы Мінабароны ў выпадку мабілізацыі. Гаворка ідзе пра аўтобусы, грузавікі, самаскіды, пагрузчыкі, бульдозеры, экскаватары і іншую цяжкую тэхніку, якая належыць дзяржаўным арганізацыям, піша «Салiдарнасць».

Вынікі праверкі, мяркуючы са звестак Базы судовых пастаноў, несуцяшальныя. Як адзначае «Радыё Свабода», якое вывучыла вынікі маніторынгу, больш за 260 кіраўнікоў арганізацый былі аштрафаваныя за непрымальны стан тэхнікі, вызначанай для перадачы вайскоўцам у выпадку мабілізацыі.

Найбольшая колькасць парушэнняў была зафіксавана ў раёнах Гомельскай вобласці, якія мяжуюць з Украінай. Часцей за ўсё гэта былі сельскагаспадарчыя прадпрыемствы.

Закон "Аб мабілізацыйнай падрыхтоўцы і мабілізацыі" (арт. 13. "Ваенна-транспартны абавязак"):

Для забеспячэння транспартнымі сродкамі Узброеных Сіл Рэспублікі Беларусь, іншых войскаў, воінскіх і спецыяльных фармаванняў у перыяд мабілізацыі і ў ваенны час у РБ устанаўліваецца ваенна-транспартны абавязак.

Ваенна-транспартны абавязак распаўсюджваецца на дзяржорганы, арганізацыі, у т.л. на рачныя парты, прыстані, аэрапорты, нафтабазы, аўтазаправачныя станцыі, рамонтныя і іншыя арганізацыі, якія забяспечваюць працу транспартных сродкаў, а таксама на грамадзян - уласнікаў транспартных сродкаў.

Як правіла, у выніку праверак высвятлялася, што прызначаная для патрэб войска тэхніка або не прайшла на момант маніторынгу тэхагляд, або была ў няспраўным і нават разабраным стане.

Адзін з прыкладаў. У канцы снежня 2021 года суд Светлагорскага раёна разглядаў справу ў дачыненні да аднаго з мясцовых сельгаспрадпрыемстваў паводле арт. 24.40 КоАП (невыкананне ваенна-транспартнага абавязку).

Згодна з пастановай суда, прадпрыемства не выканала абавязак у "захоўванні транспартных сродкаў у стане пастаяннай гатоўнасці для перадачы войскам і фарміаванням". Аўтамабілі банальна не мелі тэхагляду і не былі дапушчаны да ўдзелу ў дарожным руху.

З судовых пастаноў вынікае, што частка прадпрыемстваў, якія прайшлі праверку, знаходзіцца ў занядбаным становішчы і не ў стане забяспечваць ваенна-транспартны абавязак. І тым не менш, усе парушальнікі былі пакараныя. У большасці выпадкаў кіраўнікі проста заплацілі штрафы, нічога не тлумачачы і не апраўдваючыся.

“Як сельскагаспадарчыя прадпрыемствы “сабатавалі” магчымую мабілізацыю ў Беларусі” – такі загаловак “Радыё Свабода” дало сваёй публікацыі пра суды над парушальнікамі вайскова-транспартнага абавязку.

Калі ўлічыць вынік завершаных праверак і магчымы зыход маніторынгу, які працягваецца, то тут так і просіцца зрушэнне акцэнту. Калі хто і сабатуе патэнцыйную мабілізацыю, дык гэта тыя, хто праводзіць усе гэтыя праверкі.

Бо ў чым канчатковая мэта Закона "Аб мабілізацыйнай падрыхтоўцы і мабілізацыі"? Забяспечыць вайскоўцаў рэзервовай тэхнікай, якую для іх абавязаны належным чынам захоўваць пэўныя для гэтага арганізацыі.

Што мы бачым на практыцы? Усіх вінаватых проста пакаралі рублём. Уключаючы тых, хто з прычыны абставін не можа забяспечыць ваенных тэхнікай.

Іншымі словамі, дзяржава папоўніла бюджэт за кошт тых, хто ледзь трымаецца наплаве. Але пры гэтым канчатковая мэта не дасягнута. Ва ўсякім разе, з пастаноў суда не зразумела, ці развязваецца неяк пытанне няспраўнай тэхнікі.

Уявім на секунду, што ўсе самыя страшныя сны прапагандыстаў спраўдзіліся: замежныя легіёны ўварваліся на нашу тэрыторыю. З чым іх будуць сустракаць нашы вайскоўцы? Правільна, замест рэзервовых грузавікоў і бульдозераў у руках у іх будуць важкія стосы штрафных бланкаў. За невыкананне ваенна-транспартнага абавязку.

І, хутчэй за ўсё, гэтыя стосы могуць патаўсцець яшчэ больш. Бо з тэхнікай сёння ў дзяржустановах добра, здаецца, толькі ў гаражах у Карпеянкова і Кіраўніцтве спраў Лукашэнкі.