У Беларусі ўводзяць чарговыя змены ў «дармаедстве»

Што прыдумалі гэтым разам?

Для беларусаў падрыхтавалі чарговыя змены ў «дармаедстве». Адную з іх ужо зацвердзілі, яна тычыцца атрымання сямейнага капіталу і пачне працаваць у канцы траўня. Іншую ж навіну пакуль не зацвердзілі, яна закранае рынак працы, піша zerkalo.io.

Нагадаем, з 1 сакавіка таксама пачалі працаваць некаторыя іншыя змены, пра якія стала вядома яшчэ ў студзені.

Абмежаванне ў сямейным капітале

З 28 траўня ў Беларусі ўвядуць новыя абмежаванні ў сямейным капітале. Пра некаторыя з іх мы ўжо расказвалі. Як высветлілася, яшчэ адна навіна тычыцца «дармаедства» - некаторым сем'ям, у якіх бацькі трапяць ва «утрыманцы», не будуць прызначаць сямейны капітал. Яны таксама не змогуць датэрмінова выкарыстоўваць гэтыя сродкі.

«Уведзеная такая ўмова, як занятасць працаздольнага бацькі, айчыма ў поўнай сям'і, аднаго з бацькоў у няпоўнай сям'і, г.зн. на дату звароту прызначэння сямейнага капіталу працаздольны бацька ў поўнай сям'і павінен прапрацаваць не менш як шэсць месяцаў у 12-месячным перыядзе перад месяцам звароту», — удакладняюць у Мінпрацы.

Гэтак жа звязана з занятасцю бацькі і права на датэрміновае распараджэнне сямейным капіталам. "Калі сям'я хоча выкарыстоўваць гэтыя сродкі ў любым з напрамкаў, працаздольны бацька, айчым у поўнай сям'і, бацька ў няпоўнай сям'і павінен быць заняты не менш як 12 месяцаў у двухгадовым перыядзе перад зваротам", - дадалі ў ведамстве.

Магчымая навіна для рамеснікаў і ўладальнікаў аграсядзіб

Чыноўнікі таксама хочуць увесці змены на рынку працы. Узмацненні жорсткасці прадугледжаны праектам новага закона аб занятасці насельніцтва, яго ўжо прыняў у першым чытанні парламент. Як вынікае з дакумента асобы, якія ажыццяўляюць дзейнасць у выкананні паслуг у сферы аграэкатурызму і рамесную дзейнасць не будуць лічыцца занятымі. Гэта ж датычыцца навучэнцаў на дзённай форме атрымання адукацыі ва ўстановах адукацыі.

Калі зараз да занятых належаць таксама тыя "хто займаецца іншай не забароненай заканадаўствам дзейнасцю, якая прыносіць заробак", то ў праекце новага закона выключаны і гэты пункт.

Ці будуць прынятыя гэтыя прапанаваныя змены - пад пытаннем. Законапраект павінны будуць разгледзець дэпутаты парламента ў другім чытанні. Калі дакумент зацвердзяць, то пасля гэтага яго накіруюць у Савет Рэспублікі. Калі законапраект і тут ухваляць, то ён пойдзе на подпіс Аляксандру Лукашэнку.

Якая навіна з'явілася для агароднікаў

З 1 сакавіка запрацавала змяненне, якое датычыцца тых, хто займаецца раслінаводствам або жывёлагадоўляй на сваім зямельным надзеле. Раней такі занятак вызваляў ад «дармаедства». Адна з умоў - пляц гэты павінен знаходзіцца за рысай сталіцы і абласных гарадоў. Гэта значыць, калі вы актыўна вырошчваеце таматы ці агуркі ў сябе на лецішчы, разводзіце трусоў ці курэй і можаце гэта пацвердзіць у «дармаедскай» камісіі, то вас могуць выключыць з гэтай базы.

З 1 сакавіка ўвялі новыя ўмовы: тыя, хто займаюцца раслінаводствам або жывёлагадоўляй на сваім зямельным надзеле, не могуць адсутнічаць у Беларусі сумарна больш за 30 дзён на працягу аднаго квартала. Інакш іх залічаць у «дармаеды». Таксама з'явіўся пункт аб абавязковай рэгістрацыі па месцы жыхарства ў Беларусі тых, хто нешта вырошчвае і не хоча патрапіць ў «дармаеды».

Нагадаем, у 2022 годзе чыноўнікі ўвялі змену, паводле якой да «дармаедаў» залічваюцца тыя, хто з'ехаў за мяжу больш чым на 30 дзён, нават калі працуе ці вучыцца за мяжой. Але тут ёсць выключэнне: гэта не тычыцца тых, хто працуе або праходзіць навучанне ў краінах ЕАЭС — Расеі, Казахстане, Арменіі, Кыргызстане. Яшчэ выключэнне - выезд на лячэнне або ў службовую выправу.

Відавочна, у выпадку з агароднікамі уведзеная раней умова адсутнасці ў краіне 30 дзён не працавала.

Чыноўнікі з 1 сакавіка таксама ўвялі новаўвядзенні таксама для беларусак, якія выхоўваюць дзіця да 7 гадоў або ў якіх трое і больш непаўналетніх дзяцей. Каб не быць «дармаедамі», трэба фактычна пражываць у Беларусі - гэта значыць знаходзіцца за межамі краіны не больш за 30 дзён на працягу аднаго квартала (як і ў выпадку з агароднікамі). Выключэнне - выезд за мяжу на лячэнне або аздараўленне. Такое ж патрабаванне ўвялі і для тых, хто выхоўвае дзіця да 18 гадоў, у якога ёсць інваліднасць. Нагадаем, у выпадку выхавання непаўналетняга дзіцяці з інваліднасцю занятымі ў эканоміцы могуць лічыцца як мужчына, так і жанчына (калі размова аб дзіцяці да 7 гадоў, то такое права ёсць толькі ў жанчын).

Як і з агароднікамі, у выпадку з тымі, хто выхоўвае дзяцей, таксама былі розначытанні — ці распаўсюджваецца на іх правіла адсутнасці ў краіне 30 дзён ці не. Але зараз чыноўнікі адназначна прапісалі гэты момант.