ГУВ: У Лукашэнкі ўзнік канфлікт з расейцамі праз РСЗА «Град»

Кошт вырабу дэталяў не змаглі ўзгадніць.

Прадпрыемствы Беларусі і Расеі не змаглі ўзгадніць паміж сабой цану вырабу дэталяў да РСЗА "Град". Спрэчка ўзнікла падчас сустрэчы прадстаўнікоў кампаній, і пасля напружаных перамоў пастанавілі, што вытворчасцю зоймуцца субпадрадчыкі без адпаведных ліцэнзій, што азначае зніжэнне якасці прадукцыі.

Пра гэта 2 сакавіка паведамілі ў Галоўнай управе разведкі Міністэрства абароны Украіны.

“Прадпрыемствы дзяржавы-агрэсара Расеі і яго сатэліта, рэжыму Лукашэнкі ў Беларусі не прыйшлі да згоды наконт кошту дэталяў і вузлоў да ракетных сістэм залпавага агню “Град”, - гаворыцца ў паведамленні.

У ГУВ расказалі, што згодна з кантрактам беларускі падрадчык ААТ "Волатаўта" павінен паставіць 250 адзінак неабходнай для вытворчасці і рамонту РСЗА "Град" прадукцыі расейскаму заказчыку ЗАТ "Спецыяльнае канструктарскае бюро".

Гаворка ідзе аб рамах, асновах, накіроўвальных трубах, люльках і іншых элементах баявых машын.

Спрэчка ўзнікла падчас сустрэчы, калі дэлегацыя "Волатаўта" прадставіла паперы з разлікамі - кошт асобных тыпаў беларускай прадукцыі перавышаў чаканы расейцамі на 500-600%.

Пасля напружаных перамоў лукашысты правялі дадатковую калькуляцыю і знайшлі “выхад” - вырабляць складнікі будуць субпадрадчыкі, якія не маюць адпаведных ліцэнзій.

“Гэта будзе азначаць зніжэнне якасці прадукцыі, а значыць - падвышаныя рызыкі выкарыстання сабраных з такіх дэталяў і вузлоў РСЗА “Град”, - заявілі ў ГУВ.

Ва ўкраінскай ваеннай выведцы дадалі, што абодва прадпрыемствы знаходзяцца пад дзеяннем міжнародных санкцый.