Украінец падаў у суд на Расею за тое, што яму дрэнна спіцца

І адсудзіў $5257.

Украінец з Хмяльніцкага падаў у суд на Расею за тое, што яму дрэнна спіцца. У выніку ён адсудзіў 200 тысяч грыўняў ($5257).

Першапачаткова мужчына запатрабаваў ад краіны-агрэсара 1,2 млн грыўняў ($31546) маральнай шкоды за ўзброеную агрэсію супраць Украіны, і паскардзіўся на штодзённы стрэс праз паветраныя трывогі і неабходнасць знаходзіцца ў хованцы.

Таксама хмяльчанін заявіў, што страціў нармальны сон, уздрыгвае ад выцця сірэны, а псіхалагічны негатыў паскорыў працэс яго старэння, а разбураныя будынкі прыносяць яму дадатковы дыскамфорт.

Зрэшты, гэтыя грошы яшчэ трэба спагнаць з Расеі.