Жыхар Камянца прыехаў у выправу ў Менск і зладзіў калатнечу ў інтэрнаце
18- 25.03.2024, 14:35
- 18,108
Адзін чалавек загінуў, ягоны сын цяжка паранены.
Жыхара Камянца будуць судзіць паводле абвінавачання ў забойстве і замаху на забойства, а таксама хуліганстве і злосным хуліганстве. Прыехаўшы ў выправу ў Менск, ён напаў з нажом на суседзяў з інтэрнату - забіў аднаго чалавека і цяжка параніў яго сына, паведамілі ў пракуратуры.
Трагедыя здарылася летась у верасні. 34-гадовы жыхар Камянца прыехаў у выправу ў Менск і пасяліўся ў адным са сталічных інтэрнатаў. Аднойчы раніцай мужчына выпіў і з нажом у руцэ пачаў стукаць у дзверы пакоя, дзе жыла незнаёмая яму сям'я.
«Жанчыну, якая адчыніла дзверы, ён беспадстаўна штурхнуў у сцяну і стукнуў тварам аб дзвярны праём. Калі на шум выбеглі ейны муж і дарослы сын і паспрабавалі выправадзіць абвінавачанага ў калідор інтэрната, той дастаў нож і нанёс ім шматлікія нажавыя раненні, у тым ліку ў жыццёва важныя органы», - распавялі ў пракуратуры.
Муж жанчыны загінуў на месцы, яго сын атрымаў цяжкія раненні, небяспечныя для жыцця.
Пасля гэтага чалавек выйшаў з інтэрната на праезную частку вуліцы і пачаў біць нагамі і нажом аўтамабілі, у двух пашкодзіў элементы кузава. Неўзабаве яго заўважыў і затрымаў патруль дэпартамента аховы МУС.
Мужчыне выставілі абвінавачанні ў забойстве і замаху на забойства, а таксама хуліганстве і злосным хуліганстве, пракуратура накіравала крымінальную справу ў суд. Абвінавачаны застаецца пад вартай.