У РФ танк пратараніў аўто, якое спрабавала праехаць на чырвонае святло

Інцыдэнт здарыўся ў Ніжнім Тагіле.

У Ніжнім Тагіле ў Свярдлоўскай вобласці танк пратараніў легкавы аўтамабіль, які спрабаваў праехаць на чырвоны сігнал святлафора, паведамляе партал E1.ru са спасылкай на прэс-службу «Уралвагонзавода», якому належыць бронетэхніка.

Выданне паказала кадры, на якіх легкавік спрабуе ўвайсці ў паварот, але пасля спыняецца. У гэты момант у яго заязджае танк, які рухаўся па прамой.

Аварыя адбылася на месцы перасячэння трасы з танкавай дарогай, па якой перамяшчаецца на палігон тэхніка «Уралвагонзавода», адзначае партал. Паводле яго інфармацыі, у выніку ўдару легкавы аўтамабіль моцна скамячыла.

Як растлумачылі ў прэс-службе «Уралвагонзавода», танк рухаўся па спецыяльным праездзе ў бок выпрабавальнага палігона. Бронемашына паехала на зялёны сігнал святлафора, запэўнілі ў кампаніі.

Мясцовы партал «Все Новости» таксама піша, што кіроўца легкавога аўтамабіля паспрабаваў праехаць на чырвоны сігнал святлафора. Паводле ягоных звестак, пацярпеў Chevrolet Cruze.