Расея не можа атрымаць грошы за нафту з Кітая, Турцыі і ААЭ

Усё праз санкцыі.

Расейскія нафтавыя кампаніі сутыкаюцца з затрымкамі да некалькіх месяцаў у аплаце сырой нафты і паліва, паколькі банкі ў Кітаі, Турцыі і Аб'яднаных Арабскіх Эміратах (ААЭ) становяцца больш асцярожнымі ў дачыненні да другасных санкцый ЗША.

Пра гэта паведамляе РБК-Украіна.

Як адзначае агенцтва, затрымкі аплат скарачаюць даходы Крамля і робяць іх нестабільнымі, дазваляючы Вашынгтону дасягнуць падвойнай мэты ў галіне санкцый - сарваць паступленне грошай у Крэмль, каб пакараць яго за вайну супраць Украіны, не перарываючы пры гэтым глабальныя энэргетычныя плыні.

Са звестак васьмі банкаўскіх і гандлёвых крыніц, у апошнія тыдні некалькі банкаў у Кітаі, ААЭ і Турцыі ўзмацнілі свае патрабаванні да захавання санкцый, што прывяло да затрымак або нават адмовы ў грашовых пераводах у Маскву.

Банкі, асцерагаючыся другасных санкцый ЗША, пачалі прасіць сваіх кліентаў падаць пісьмовыя гарантыі таго, што ні адна фізічная або юрыдычная асоба з спісу SDN ЗША (Special Designated Nationals) не ўдзельнічае ў пагадненні і не з'яўляецца бенефіцыярам аплаты.

У ААЭ банкі First Abu Dhabi Bank (FAB) і Ісламскі банк Дубая (DIB) заблакавалі некалькі рахункаў, звязаных з гандлем расейскімі таварамі, паведамілі дзве крыніцы.

Банк Mashreq у ААЭ, турэцкія Ziraat і Vakifbank, а таксама кітайскія банкі ICBC і Bank of China усё яшчэ апрацоўваюць плацяжы, але на іх апрацоўку сыходзяць тыдні ці месяцы, паведамілі чатыры крыніцы.

Прадстаўнік Крамля Дзмітрый Пяскоў заявіў, што праблемы з плацяжамі існуюць, калі яго спыталі пра паведамленні аб тым, што банкі ў Кітаі запаволілі выплаты.