Слонімец забыўся на балконе размарожаную курыцу, і яна яму «адпомсціла»

Падвяла пад крымінальны артыкул.

Жыхар Слоніма пашкодзіў чужы аўтамабіль курынай тушкай, якую выкінуў з акна. Мяса «правінілася» перад мужчынам тым, што пратухла падчас размарозкі на балконе. Падрабязнасці інцыдэнту расказалі ў міліцыі.

16 сакавіка 40-гадовы жыхар Слоніма выпісаўся са шпіталя, а калі прыйшоў дадому, адчуў непрыемны пах. На балконе ён убачыў пратухлую тушку курыцы, якую пакінуў размарожвацца перад шпіталізацыяй.

На эмоцыях мужчына выкінуў сапсаваны прадукт з балкона. З іроніі лёсу тушка прызямлілася на лабавое шкло чужога аўтамабіля - не абышлося без пашкоджання.

Праз некаторы час да аўто выйшаў ягоны ўладальнік, убачыў, што адбылося, і паведаміў у міліцыю. Падазраванага неўзабаве выявілі, а мясцовы аддзел Следчага камітэта завёў крымінальную справу паводле артыкула аб хуліганстве.