У польскім Каніне адбыўся буйны пажар на мэблевай фабрыцы

Агонь ахапіў чатыры вытворчыя цэхі агульнай плошчай 4500 кв. м.

Раніцай на заводзе ў вытворчасці акрылавых фасадаў у польскім Каніне адбыўся пажар. Загарэліся чатыры цэхі, кожны плошчай блізу 1000 кв. м.

Будынкі знаходзіліся побач адзін з адным, таму агонь лёгка распаўсюдзіўся. Мала таго, побач з заводам знаходзяцца прыватныя дамы, з найбліжэйшага з якіх давялося эвакуяваць людзей, паведамляе RMF FM.

– На першым этапе аперацыі мы засяродзіліся на тым, каб не дапусціць распаўсюджвання агню на жылы дом. Таксама неабходна было абараніць будынкі, складскія памяшканні, якія размешчаныя вакол завода, – расказаў у інтэрв'ю RMF FM прэс-аташэ Акруговага штаба Дзяржаўнай пажарнай службы ў Лембарку капітан-лейтэнант Марцін Эльварт.

Паводле словаў пажарнага, у аперацыі тушэння пажару – на піку – былі задзейнічаныя 33 пажарныя брыгады, гэта значыць 140 пажарных. На месцы здарэння знаходзіцца цяжкая тэхніка для паслядоўнага дэмантажу залаў, зазначыў ён.

Аперацыя ў тушэнні пажару ў Каніне можа прадоўжыцца да 22:00 ці нават даўжэй.

У выніку пажару пацярпеў адзін чалавек, пажарны, які ўдзельнічаў у тушэнні. Мужчына атрымаў атручэнне дымам і быў дастаўлены ў лякарню для абследавання.

На месцы здарэння назіраецца моцнае задымленне. Службы прадаўжаюць заклікаць жыхароў не адчыняць вокны ў мэтах бяспекі і пры магчымасці заставацца ў памяшканні.

Цяпер пажар узяты пад кантроль, вядзецца ліквідацыя наступстваў.