Беларус праехаў 335 кіламетраў на веласіпедзе, не выходзячы з гандлёвага цэнтра

Устанавіў нацыянальны рэкорд.

Спартовец-аматар Жэня Мельнікаў устанавіў нацыянальны рэкорд, пераадолеўшы дыстанцыю 335 кіламетраў на велатрэнажоры. За спартовым дасягненнем можна было паназіраць ужывую: велатрэнажор размясцілі на першым паверсе ТРЦ Galleria Minsk. Стартаваў Яўген а дзясятай гадзіне раніцы 2 сакавіка, а закончыў заезд а гадзіны ночы 3 сакавіка, ужо пасля закрыцця ГЦ. У выніку чысты час велазаезду склаў 13 гадзін 28 хвілін 47 секунд.

Акрамя спартыўнай мэты, у заезду была яшчэ адна - дабрачынная. Паралельна ішоў збор сродкаў для 12-гадовага Уладзіслава Мікульскага. У хлопчыка з нараджэння шэраг цяжкіх дыягназаў: ДЦП, спастычны тэтрапарэз, цяжкая інтэлектуальная недастатковасць. Даглядае яго бабуля. Сабраныя сродкі пойдуць на набыццё спецыяльнага электраквазка і лекаў.

У мінулым спартовец ужо ўстанавіў два нацыянальныя рэкорды, але ў іншых дысцыплінах. Так, у 2022 годзе ён пераадолеў на трэнажоры ў веславанні 100 кіламетраў 125 метраў за 9 гадзін 38 хвілін 58 секунд без перапынку, а мінулым летам праплыў 24,5 кіламетра па Вілейскім вадасховішчы - на заплыў пайшло 10 гадзін 46 хвілін.

Як Яўген распавёў Onlíner, у перыяд падрыхтоўкі да новага рэкорду ў яго было па чатыры-пяць трэніровак на тыдзень: гэта і плаванне, і ровар, і кросфіт, і трэнажорная зала, і нават шахматы. Плюс сваю ролю адыгралі выверанае харчаванне і фізіятэрапія. Са слоў спартоўцы, на наступны дзень пасля ўстанаўлення рэкорду ён пачуваецца добра. Адзінай праблемнай зонай нечакана сталі кісці рук.

- Не думаў, што яны так моцна заб'юцца і ператомяцца. Было цяжка трымаць стырно апошнія тры гадзіны, рукі дранцвелі. Цяпер займаюся іх аднаўленнем. Але з нагамі, каленямі, рукамі і корпусам усё ў парадку.