Вайсковы эксперт: Чарнаморскі флот РФ заціснулі ў кут
2- 4.03.2024, 18:47
- 5,162
![Вайсковы эксперт: Чарнаморскі флот РФ заціснулі ў кут](https://i.c97.org/ai/453712/aux-head-1644140392-20220206_ukr_360.jpg)
Валянцін Бадрак расказаў, чым можна дабіваць расейскія караблі.
Украіна атрымлівае ад заходніх хаўруснікаў надта мала найноўшай тэхнікі, а тая, што перадаецца, пераважна датычыцца супрацьпаветранай і супрацьракетнай абароны, заявіў вайсковы эксперт, дырэктар Цэнтра даследаванняў войска, канверсіі і раззбраення, пісьменнік Валянцін Бадрак.
Як падкрэсліў ён падчас чата ў «Главреде», Украіне варта звярнуць увагу на паглыбленне супрацоўніцтва са Швэцыяй.
«Швэцыя ў найбліжэйшыя дні набудзе статус краіны-сябра NATO, і нам варта супрацоўнічаць з ёй, бо ў яе ёсць такія ракеты як Naval Strike Missile (NSM) – найлепшыя зараз супрацькарабельныя ракеты. Гэтыя ракеты могуць размяшчацца на катарах Skjold, якія маюць звышвысокую манеўранасць і 65 вузлоў хуткасці. Такіх катараў, мне здаецца, амаль няма ў свеце», - падкрэсліў эксперт.
Ён упэўнены ў тым, што такія катары з ракетамі - гэта будучыня нашага флоту ў плане абароны.
«Нам зараз не трэба вялікага надводнага флоту, бо ён вельмі хутка будзе знішчацца ракетамі», – удакладніў аналітык.
Суразмоўца сказаў, што Украіне варта весці перамовы з Турцыяй аб куплі найноўшых знішчальнікаў пятага пакалення, дронаў Bayraktar і Akinci, а таксама зрабіць усё для рэалізацыі праекта будаўніцтва завода Baykar Makina.
«Нам варта мадэрнізаваць нашыя пазіцыі падчас вайны. Уласна, ёсць і берагавыя новыя комплексы Coastal Defense System з ракетамі Naval Strike Missile. Маючы такія комплексы і ўкраінскія Нэптуны, у нас была б велізарная магчымасць знішчаць флот супраціўніка. Але, у выніку, мы ў кожным выпадку знішчым Чарнаморскі флот РФ, бо флот заціснуты ў кут. Гэта дакладна», - дадаў Бадрак.