СМІ: Спецназаўцаў Крамля Пятрова і Башырава закідвалі ў Беларусь

Раскрытыя дэталі замахаў ГРУ РФ на Уладзіміра Зяленскага.

Міжнародны журналіст-расследавальнік выдання Bellingcat Хрыста Грозеў раскрыў намеры Расеі ў дачыненні да найвышэйшага ўкраінскага кіраўніцтва яшчэ да пачатку поўнамаштабнага ўварвання. Спецназаўцы акупантаў павінны былі ліквідаваць прэзідэнта Украіны Уладзіміра Зяленскага.

Для гэтага, паводле звестак Грозева, расейцы пасяліліся ў Кіеве і чакалі прыдатнага моманту для ажыццяўлення намераў. Аднак у расейскіх захопнікаў не атрымалася ажыццявіць свой план.

Спецназаўцы Крамля рыхтавалі замах на Зяленскага

Хрыста Грозеў адзначыў, што Галоўная выведная ўправа генеральнага штаба ўзброеных сілаў Расеі задоўга да пачатку поўнамаштабнага ўварвання пачала аперацыю ліквідацыі верхавіны ўкраінскай улады.

Для гэтага ў Кіеў прыбыла элітная група ўзброеных расейскіх спецназаўцаў, якая павінна была ў патрэбны момант захапіць урадавы квартал Кіева, ліквідаваць міністраў і прэзідэнта Зяленскага.

– Яшчэ за некалькі тыдняў да пачатку вайны яны зайшлі праз Беларусь, каб быць паблізу Кіева. Частка з іх увайшла ў Кіеў і рыхтавалася да ўзяцця ўрадавага квартала. Іх было блізу 30 чалавек, гэта вельмі элітная група... – адзначыў журналіст.

Ён адзначыў, што яшчэ да ўварвання ва Украіну на базе ГРУ стварылі так званы «клон» ПВК «Вагнер», які і павінен быў здзейсніць замах. Аднак журналіст-расследавальнік зазначыў, што іх аперацыя адразу пайшла не паводле плану, бо расейцы ў нечым памыліліся і былі вымушаныя месяцамі хавацца ва Украіне.

«Мы сачылі за камунікацыямі некалькіх чальцоў гэтай каманды. І было і страшна, і смешна: страшна, таму што бачылі, якія ў іх мэты, а смешна, таму што яны з кожным днём станавіліся ўсё менш ура-патрыётамі, пачалі крытыкаваць кіраўніцтва за дрэнна спланаваную аперацыю», – адзначыў Грозеў.

Ён адзначыў, што расейскія спецназаўцы спачатку пісалі жонкам, што застануцца на тыдзень, потым на два, а пасля – на месяц, паўгода. Пасля расейцы сталі псіхалагічнымі ахвярамі ўласнай вайны і сумнявацца ў вернасці сваіх жонак, пра што, паводле словаў Грозева, можна напісаць раман.

Частку спецназаўцаў атрымалася ліквідаваць

Грозеў адзначыў, што прынамсі частку расейскіх дыверсантаў украінцы здолелі выкрыць і знішчыць. Сярод прадстаўнікоў ГРУ, якія збіраліся забіць Зяленскага, былі вядомыя ўсім так званыя Аляксандр Пятроў і Руслан Башыраў, сапраўдныя імёны якіх Анатоль Чапіга і Аляксандр Мішкін. Раней гэтых асобаў абвінавачвалі у атручэнні былога афіцэра разведкі Расеі Сяргея Скрыпаля і ягонай дачкі Юліі ў 2018 годзе.

Частку з іх забілі. Для нас цяпер цікава зрабіць спіс тых, каго забілі Узброеныя сілы Украіны. Для нас гэта важна, таму што гэтыя людзі небяспечныя для нас – для расследавальнікаў і расейскай апазіцыі за мяжой, таму што, нават калі яны не могуць, як раней, падарожнічаць па свеце, яны з'яўляюцца спецыялістамі ў арганізацыі замахаў за мяжой. Таму важна зразумець, каго з іх ужо няма ў жывых, – падкрэсліў Грозеў.

Затое тыя расейцы, якія здолелі выратавацца, цяпер знаходзяцца ў тыле ў краіне-агрэсаркі і ўдзельнічаюць у вайне з Украінай дыстанцыйна. Аднак ёсць і тыя, хто прадаўжае час ад часу пранікаць ва Украіну.

– Цяпер частка з тых, хто выжыў, прадаўжае займацца дыверсійнымі пранікненнямі на тэрыторыю Украіны з Беларусі, – адзначыў журналіст-расследавальнік.

Ён таксама адзначыў, што імёны здраднікаў будуць апублікаваныя пазней, ужо пасля заканчэння расследавання.