У Менску ўжо ёсць першыя пацярпелыя ад кляшчоў

Сезон пачаўся.

Кляшчы могуць напасці ў кожную пару года, калі тэмпература паветра вышэй +5°C. Пра гэта распавяла 5 сакавіка лекарка-эпідэміёлаг Менскага гарадскога цэнтра гігіены і эпідэміялогіі Вольга Семіжон на семінары ў Гарадскім цэнтры здароўя, перадаюць «Минск-Новости».

- У гэтым годзе ў сталіцы першы ўкус кляшча зарэгістраваны 26 лютага ў лесапаласе ля 10-й бальніцы, - адзначыла А. Семіжон. - Пры тэмпературы паветра +5... +7°C пачынаецца сезон кляшчоў. Май-травень і жнівень-верасень - гэта перыяды іх падвышанай актыўнасці.

Як заўважыла Семіжон, кляшчы чакаюць ахвяру, узлезшы на траву або хмызнякі на вышыню прыкладна 50-100 см. Гэтыя кузуркі небяспечныя тым, што могуць пераносіць узбуджальнікаў розных інфекцый, напрыклад, клешчавога энцэфаліту, хваробы Лайма і іншых. І калі ад першага захворвання можна зрабіць прышчэпку, то ад другога вакцыны не існуе.

Таму для абароны ад кляшчоў пажадана карыстацца рэпелентамі ў выглядзе спрэяў, мазяў і іншых. Не варта забываць аб мерах засцярогі: у лесапарках шпацыраваць па шырокіх пешаходных дарожках, не залазіць у зараснікі хмызоў. Збіраючыся на прыроду, экіпіруйцеся адпаведным чынам: надзеньце галаўны ўбор, жакет з доўгім рукавом, запраўце штаны ў абутак. Падчас шпацыру па лесе кожныя дзве гадзіны праводзіце сама- і ўзаемаагляды, тое ж самае зрабіце пасля вяртання.

Калі клешч усё ж укусіў, можна паспрабаваць выдаліць яго самастойна. Але лепш звярнуцца па дапамогу ў паліклініку, пажадана да лекар-інфекцыяніста. Калі лекар у адпачынку ці на ліську непрацаздольнаці, пракансультуйцеся ва ўчастковага тэрапеўта.

Варта адзначыць, што пры ўкусе кляшча неабходны прафілактычны прыём прэпарата. Звычайна лекар прызначае антыбіётык, які трэба прыняць у першыя 72 гадзіны пасля ўкусу. Як правіла, для дарослага гэта аднаразовая доза. Пасля прыёму антыбіётыка назірайце за сваім станам здароўя не менш за месяц.