Беларусаў папярэджваюць пра магчымую дэвальвацыю

На колькі нацвалюта абясцэнілася да даляра з пачатку года.ачала года.

Беларускі рубель за першы квартал гэтага года патаннеў на 2,28% адносна даляра. Гэта трэці паказнік сярод краінаў былога СССР, адзначае «Позірк». Раней і эксперты, і Нацбанк заяўлялі, што ў Беларусі ёсць рызыка дэвальвацыі нацвалюты.

На 31 сакавіка курс даляра паводле Нацбанка склаў 3,2498 рублі. Гэта на 2,28 адсотка больш, чым на 31 снежня летась. Гэта трэці паказнік на тэрыторыі былога СССР, сведчыць праведзены «Позіркам» параўнальны аналіз каціровак цэнтрабанкаў на 31 снежня 2023 года і 31 сакавіка 2024-га.

У лідарах паводле вынікаў першага квартала Украіна – на 3,26% (з 37,9824 да 39,2214 грыўны) і Расея – на 2,99% (з 89,6883 да 92,3660 рубля). Трэцяе месца з Беларуссю падзяліў Узбекістан, дзе даляр падаражэў таксама на 2,28 адсотка (з 12338,77 да 12620,09 сума).

Далей ідуць Латвія, Літва і Эстонія – 2,21% (з 0,905 да 0,925 еўра), Малдова – 1,37% (з 17,4062 да 17,6449 лея), Кыргызстан – 0,43% (з 89,085 да 89,4708 сома), Грузія – на 0,22% (з 2,6894 да 2,6953 лары).

Амерыканская валюта патаннела ў Таджыкістане – на 0,05% (з 10,9571 да 10,9511 самані), Казахстане – на 1,71% (з 454,56 да 446,78 тэнге) і Арменіі – на 2,84% (з 404,79 да 404,16 драма). У Азербайджане афіцыйны курс амерыканскай валюты не мяняецца з 7 сакавіка 2018 года (1,7 маната), у Туркменістане – з 1 студзеня 2015-га (3,5 маната).

Што прагназуюць банкі і аналітыкі датычна курсу рубля да даляра на 2024 год

Нагадаем, паводле прагнозу некаторых беларускіх банкаў, нацвалюта ў 2024 годзе можа аслабнуць да 10% да цяперашніх значэнняў.

Аналітыкі BEROC таксама чакаюць, што нават пры адсутнасці шокаў беларускі рубель будзе слабець да кошыка валютаў – паводле вынікаў года знізіцца на 8-9%. Паводле іх прагнозу, пры знаходжанні курсу даляра да расейскага рубля паблізу 95–100 расейскіх рублёў за даляр курс даляра да беларускага рубля складзе 3,44 беларускага рубля за даляр у сярэднім за 2024 год (за цяперашні – 3,02 рубля). У такім выпадку 100 расейскіх рублёў будуць каштаваць 3,54 беларускага рубля.

У Нацбанку раней заявілі, што бачаць дэвальвацыйныя і інфляцыйныя рызыкі, якія звязаныя ў тым ліку з тым, што ў эканоміцы расце агульны памер «лішніх» сродкаў. Гэта выклікана сярод іншага тым, што насельніцтва і бізнэс актыўна набіраюць крэдыты.