Жыхары Арэнбурга разгневаныя і пагражаюць мітынгамі Крамлю

Наваколле горада імкліва тоне.

Наваколле расейскага Арэнбурга імкліва сыходзіць пад ваду. Жыхары ў лютасці і пагражаюць мітынгамі ўжо ў сталіцы рэгіёну, піша «Можем объяснить».

Паводле слоў губернатара рэгіёну Дзяніса Паслера, узровень вады ва Урале набліжаецца да рэкорднай адзнакі 11 м. Кіраўнік рэгіёну заклікаў жыхароў падтопленых раёнаў эвакуавацца. Сотні дамоў у наваколлях Арэнбурга і некалькіх раёнаў самога горада з паўмільённым насельніцтвам ужо пайшлі пад ваду.

«Можем объяснить» звязаўся з пацярпелымі.

«Усё толькі пагаршаецца, дом тоне, - кажа Юлія Селіна, якая жыве ў пасёлку Вясновым (на відэа), за 30 хвілін язды ад Арэнбурга, - у нас затапіла шмат каго і кіраўніцтва бяздзейнічае, усе маўчаць».

«Сына малодшага выцягнулі праз акно, нас змаглі вывесці праз дзверы, - працягвае Юлія. - Сын моцна спалохаўся. Мы толькі зрабілі рамонт, купілі мэблю і ўсё кату пад хвост!». Сітуацыю пагаршае яр у пасёлку, куды сцякаецца адталая вада, і які ўлады не сталі чысціць перад паводкай, праігнараваўшы просьбы жыхароў.

Абяцаных выплат на аднаўленне не хопіць. «Шкода дома ніхто не бярэ ў разлік. Не кажучы ўжо пра мэблю, рамонт, тэхніку, рэчы. Мы нічога не вывезлі. Я такая не адна. Людзей не задаволіць, значыць будзе мітынг», - абяцае яна.

Валерыя, чым дом затапіла ў пасёлку Зарэчны, працуе ў адміністрацыі вобласці. 10 красавіка вада падышла да яе дома і за лічаныя хвіліны двор поўнасцю затапіла. «Як жыхар вобласці, канечне я думаю, што выплаты маленькія і не кампенсуюць страт, але як дзяржаўны службоўца мяркую, што гэта толькі першасныя выплаты», - кажа яна.

Вось што пішуць жыхары Арэнбурга ў мясцовых пабліках і на старонцы губернатара Паслера:

«Спецыяльная водная аперацыя ідзе паводле плану».

«Чаму такія смешныя сумы выплат пацярпелым? Людзі страцілі ўсё з-за халатнасці чыноўнікаў!»

«У людзей дамоў няма, а вы даяце 20 тысяч? Яны на гэта павінны жыць, дзяцей карміць?

«Дзякуй мэрыі Арэнбурга за тое, што выдаткавалі бюджэт на ліхтарыкі замест інжынернай абароны горада».

«Паслера на СВА!».