Бельгія пачала расследаванне подкупу еўрапарламентарыяў Расеяй

Расея плаціла еўрапарламентарыям, каб яны распаўсюджвалі крамлёўскую прапаганду.

Расея плаціла чальцам Еўрапейскага парламента, каб распаўсюджвалі крамлёўскую прапаганду, і спрабавала правесці больш супольнікаў у заканадаўчы орган ЕЗ падчас намечаных на чэрвень выбараў. Факты ўмяшання выявіла бельгійская выведка і пракуратура пачала расследаванне, паведаміў прэм'ер-міністр краіны Аляксандр дэ Кро.

Масква імкнецца падарваць падтрымку Украіны ў Еўропе, заявіў ён:

«Бельгійскія выведвальныя службы пацвердзілі існаванне прарасейскіх сетак умяшання, якія дзейнічаюць у некалькіх еўрапейскіх краінах, у тым ліку Бельгіі. Паводле звестак нашай выведкі, мэта Масквы гранічна зразумелая. Яна палягае ў тым, каб дапамагчы абраць больш прарасейскіх кандыдатаў у Еўрапейскі парламент і ўзмацніць прарасейскі наратыў у гэтым інстытуце. Гэта абсалютна ясна».

Дзеянні Масквы былі выкрытыя ў выніку аперацыі чэшскіх спецслужбаў, якія выявілі расейскі прапагандысцкі рэсурс Voice of Europe, які дзейнічаў у Празе. Ён быў часткай аперацыі па распаўсюджванні расейскага ўплыву, якая праводзілася ў шасці еўрапейскіх краінах. Адным з кіраўнікоў аперацыі быў былы ўкраінскі палітык Віктар Медзвядчук, кум Уладзіміра Пуціна. Ён быў арыштаваны ва Украіне ў красавіку 2022 г. паводле абвінавачання ў дзяржздрадзе, затым перададзены Маскве ў абмен на ваеннапалонных.

Паводле інфармацыі Der Spiegel, Voice of Europe адыгрывала важную ролю ў фінансаванні кандыдатаў на выбары ў Еўрапарламент, перш за ўсё ад вельмі правых партый. Грошы палітыкі з Нямеччыны, Францыі, Польшчы, Бельгіі, Нідэрландаў і Вугоршчыны атрымлівалі альбо падчас сустрэч у Празе, альбо ў крыптавалюце.

«Як паказала [чэшскае] расследаванне, Масква звязвалася з чальцамі Еўрапейскага парламента і плаціла ім, каб яны прасоўвалі там яе позву, - паведаміў дэ Кро. - Паслабленне еўрапейскай падтрымкі Украіны служыць інтарэсам Расеі на фронце. Гэта рэальная мэта дзейнасці, якая была выкрытая ў апошнія тыдні».

Выданне Politico прааналізавала 50 ролікаў, размешчаных на YouTube-канале Voice of Europe. Высветлілася, што ў перадачах рэсурсу ўдзельнічала 16 сябраў Еўрапарламента - усе ад правых ці вельмі правых партый, усе з антыўкраінскай і прарасейскай пазіцыяй. «Гэта вайна цывілізацый, і, спадзяюся, цывілізацыя ва Украіне саступіць», - казаў ультраправы нідэрландскі палітык Марсэль дэ Грааф падчас арганізаванай Voice of Europe перадачы ў тэлестудыі Еўрапарламента ў кастрычніку 2023 г. Іншы ўдзельнік гутаркі, вельмі правы палітык з Нямеччыны Максімілі заявіў: «Украіна павінна стаць дэмілітарызаванай буфернай зонай».

Аб неабходнасці стварэння на ўкраінскіх тэрыторыях буфернай зоны казаў і Уладзімір Пуцін.

Трынаццаць з 16 палітыкаў, з якімі ўдалося звязацца Politico, заявілі, што грошы не бралі ці ім іх не прапаноўвалі.

Існаванне сеткі, якая спрабавала ўплываць на палітыкаў, пацвердзілі спецслужбы Нямеччыны. Нямецкія ўлады пачалі папярэдняе расследаванне ў дачыненні да чальца ультраправай партыі «Альтэрнатыва для Германіі» Пятра Бістрона. Чэшскія СМІ назвалі Бістрона, аднаго з галоўных кандыдатаў партыі на будучых выбарах у Еўрапарламент, у ліку тых, хто браў хабар ад Расеі. Да вайны Масква актыўна падтрымлівала «Альтэрнатыву для Германіі», з ёй супрацоўнічала «Адзіная Расія».

У Польшчы між тым нядаўна былі праведзеныя два ператрусы, падчас якіх былі канфіскаваныя 48 500 і 36 000 еўраў. Адзін з падазраваных - чалавек, на якога магла быць зарэгістраваная Voice of Europe і які падазраецца ў распаўсюджванні антыўкраінскай інфармацыі. На паведамленні польскіх СМІ, грамадзянін краіны быў абвінавачаны ў подкупе еўрапарламентарыяў і стварэнні расейскай «зоны ўплыву ў Еўропе».

Бельгія на мінулым тыдні прыняла закон, які крыміналізуе ўмяшанне замежных краін у палітычны працэс. Хаця самі хабары даваліся не ў Бельгіі, умяшанне мела месца, таму судовыя ўлады краіны пацвердзілі, што справа трапляе пад іх юрысдыкцыю, растлумачыў дэ Кро.