Лукашэнка аб уступленні ў вайну супраць Украіны: Мяжа забарыкадаваная так, што нам туды не падысці

Дыктатар таксама прызнаў, што ён суагрэсар.

Аляксандр Лукашэнка заявіў, што не ўступае ў вайну супраць Украіны, бо ўкраінская мяжа цалкам замінаваная і забетанаваная.

Аб гэтым Лукашэнка сказаў у інтэрв'ю расейскім прапагандыстам.

«Калі б мы сёння ўступілі ў вайну супраць Украіны, гэта нічога не дало б. Таму што ў іх (украінцаў - рэд.) мяжа з Беларуссю забарыкадаваная так, што туды не падысці», - заявіў ён.

Са слоў Лукашэнкі, мяжа Украіны цалкам замінаваная і забетанаваная.

Таксама беларускі дыктатар ацаніў колькасць украінскіх войскаў на адцінку беларускай мяжы на 120 тысяч чалавек.

«Ну, яны хочуць кінуць на фронт (войскі, якія знаходзяцца на мяжы - рэд.) супраць Расеі, а тут французаў паставіць. Мы чакаем», - дадаў Лукашэнка.

Акрамя гэтага, Лукашэнка прызнаў, што ён суагрэсар.

«Я ж не адмаўляюся, што мы - суагрэсары. Кожны робіць сваю справу», - дадаў Лукашэнка.