СБУ раскрыла асаблівасць сваіх марскіх дронаў

На ўзбраенні Украіны знаходзяцца марскія дроны Sea Baby і «Мамай».

У марскіх беспілотнікаў СБУ няма аналагаў на Захадзе і яны незаўважныя для варожых сістэм выяўлення. На ўзбраенні СБУ сёння знаходзяцца марскія дроны Sea Baby і «Мамай».

Пра гэта сказаў спікер СБУ Арцём Дзехцярэнка, паведамляе РБК-Украіна са спасылкай на эфір тэлемарафона.

«У 2022 годзе ў свеце не было альтэрнатывы ўдарным марскім дронам СБУ. Існыя заходнія беспілотнікі былі вялікія і непаваротлівыя, іх лёгка маглі выяўляць варожыя РЛС. Да таго ж заходнія дроны не мелі баявой часткі, таму што выкарыстоўваліся для лагістыкі або разведкі», – распавёў прадстаўнік СБУ. 

Таму, са слоў Дзехцярэнкі, у СБУ наважылі распрацаваць канцэпт уласнага марскога ўдарнага дрона, які павінен быў працаваць у шумавым дыяпазоне на мяжы двух асяроддзяў – вады і паветра.

«Менавіта праз яго малыя памеры знізу яго не чуе гідраакустыка, а зверху яго не заўважаюць РЛС. Больш таго, корпус дрона выраблены з радыёпаглынальнага матэрыялу. Гэты канцэпт цалкам пацвердзіў сваю незаўважнасць і ўдарную магутнасць падчас аперацый, якія СБУ праводзіла разам з ВМС. Такія дроны можна ўбачыць толькі ўжо візуальна, а не на сістэме назірання», – сказаў ён.

У цэлым, як распавёў прадстаўнік СБУ, гэтыя марскія дроны пашкодзілі 11 караблёў РФ, а таксама Крымскі мост, які РФ выкарыстоўвала для пастаўкі ўзбраення на вайну. Кошт дронаў СБУ ацэньваецца ў 8,5 млн грыўняў, тады як знішчаныя імі расейскія караблі каштуюць некалькі дзясяткаў мільёнаў даляраў.

«Мы, вядома, не можам раскрываць усе тэхнічныя характарыстыкі, але можам адзначыць, што гэта ўжо новыя пакаленні дронаў, над удасканаленнем якіх мы працягваем працаваць. Напрыклад, Sea Baby 2024 года – гэта робат новага пакалення, які яшчэ больш смяротны. Ён здольны даставіць амаль тону ўзрыўчаткі больш як на 1000 кіламетраў. СБУ можа дастаць цэль практычна ў любым пункце Чорнага мора», – дадаў Дзехцярэнка.