Прызыўнік з Івацэвічаў прыехаў у псіхіятрычную лякарню і адмовіўся праходзіць абследаванне, пабываўшы ўнутры

Ён уступіў у барацьбу з вайсковым камісарыятам.

Летась падчас восеньскага прызыву жыхара Івацэвічаў накіравалі ў псіхіятрычную лякарню для ўдакладнення дыягназу. Але мужчына адмовіўся ад абследавання: яго не задаволіла, што ў палаце не было дзвярэй, у туалеце - асобных боксаў, а ўваходныя дзверы аддзялення зачынілі на ключ.

У выніку вайсковы камісарыят падаў на прызыўніка ў суд, а той прызначыў два месяцы арышту, піша BGMedia са спасылкай на судовую пастанову.

Восеньскі набор у войска ў Беларусі праходзіў з 1 жніўня да 30 лістапада 2023 года. Падчас яго ў вайсковы камісарыят у Івацэвічах выклікалі мясцовага жыхара Барыса (імя выдуманае). З пастановы суда вядома, што ён нарадзіўся ў 2000 годзе, мае сярэднюю адукацыю, на момант суда афіцыйна не працаваў, судзімасці не мае.

Увосень мінулага года Барыс праходзіў мерапрыемствы набору. 24 кастрычніка ён прыйшоў на абследаванне да псіхіятра-нарколага, якая абследуе прызыўнікоў па лініі вайсковага камісарыяту. З асабістай справы Барыса лекарка даведалася, што ён «неаднаразова прыцягваўся да адміністрацыйнай адказнасці за ўчыненне правапарушэнняў у стане алкагольнага ап'янення, а таксама быў судзімы за ўчыненне злачынстваў».

У час размовы з ёй Барыс «ішоў неахвотна на кантакт, на пытанні адказваў адным складам, не змог пракаментаваць адну з прыказак». Таксама хлопец расказаў лекарцы, што напярэдадні выпіваў. Жанчына на судзе ў якасці сведкі распавяла, што ў мужчыны «былі прыкметы нядаўняга ўжывання алкаголю, з рота быў чутны нязначны характэрны пах алкаголю».

У выніку пасля гутаркі з Барысам лекарка пастанавіла накіраваць яго на медыцынскае абследаванне ў псіхіятрычную лякарню «Магілёўцы» для ўдакладнення дыягназу «Змяшаны разлад асобы?», а таксама ва ўстанову аховы здароўя на літару «Б» для ўдакладнення дыягназу «Ужыванне алкаголю са шкоднымі наступствамі».

Паколькі ў Івацэвіцкай цэнтральнай раённай лякарні няма псіхіятрычнага стацыянара, Барыса накіравалі ў Берасцейскую абласную псіхіятрычную лякарню «Магілёўцы», якая знаходзіцца ў аднайменнай вёсцы ў Пружанскім раёне.

Апоўдні 13 лістапада маладзён прыехаў у гэтую псіхіятрычную лякарню, яго засялілі ў палату. Барыса не задаволілі ўмовы, таму а 15 гадзіне ён пайшоў да галоўнага лекара і напісаў заяву аб адмове праходжання абследавання. У судовай пастанове так апісваюцца ўмовы ў шпіталі: “Дзверы ў палату адсутнічалі, у туалеце не мелася асобных боксаў. Былі зачыненыя ўваходныя дзверы аддзялення на ключ».

24 лістапада Барыса выклікалі ў вайсковы камісарыят, яму патлумачылі наступствы адмовы ад абследавання. Хлопец адказаў, што яго не задаволілі ўмовы ўтрымання ў псіхіятрычным шпіталі, ён уважае сябе нармальным чалавекам, псіхічных адхіленняў у яго няма.

Праз адмову легчы ў лякарню супрацоўнік вайсковага камісарыята склаў на яго адміністрацыйны пратакол за ўхіленне ад мерапрыемстваў набору. 9 студзеня 2024 г. суд Івацэвіцкага раёна прызнаў Барыса вінаватым паводле арт.25.1 КоАП і аштрафаваў яго на 40 рублёў (адна базавая адзінка).

У той жа дзень, 24 лістапада, супрацоўнік вайсковага камісарыяту выпісаў Барысу новае накіраванне ў псіхіятрычны шпіталь на 27 лістапада, але хлопец адразу адмовіўся, патлумачыўшы, што яго не задавальняюць умовы, у якіх ён павінен праходзіць абследаванне. Ён пагадзіўся прайсці абследаванне ў цэнтральнай раённай лякарні. Пры гэтым Барыс намагаў, што не абавязаны праходзіць абследаванне ў псіхіятрычным шпіталі.

«Аднак, згодна з заканадаўствам, дзённая форма абследавання прызыўнікоў у амбулаторных умовах ва ўстанове аховы здароўя не дапускаецца», напісана ў пастанове суда. Таксама супрацоўнік вайсковага камісарыята папярэдзіў маладзёна аб крымінальнай адказнасці за адмову ад праходжання медыцынскага абследавання.

Супрацоўнікі вайсковага камісарыята чакалі да 30 лістапада (апошні дзень восеньскага набору ў войска), што Барыс усё ж ляжа ў псіхіятрычную лякарню. Але ён гэтага не зрабіў і не падаў ніякіх дакументаў, што гэта было па ўважлівай прычыне. У выніку 30 лістапада вайсковы камісарыят накіраваў матэрыялы ў дачыненні да Барыса ў Івацэвіцкі РАУС для прыцягнення яго да адказнасці паводле ч.1 арт.435 КК (Ухіленне ад мерапрыемстваў прызыву на вайсковую службу).

Што пастанавіў Івацэвіцкі суд

Да суда з Барыса ўзялі падпіску аб нявыездзе з Беларусі і належных паводзінах. Таксама яго адправілі на судова-псіхалагічную экспертызу, якая пацвердзіла, што падчас восеньскага прызыву маладзён «не пакутаваў на які-небудзь разлад (захворванне)». На момант суда Барыс не пакутаваў на якія-небудзь псіхічныя разлады, таму яго прызналі разумным.

Што да суда, то яго пастанавілі зрабіць «паказальным». Выязное пасяджэнне правялі 18 сакавіка ў будынку вайсковага камісарыята Івацэвіцкага раёна. З паведамлення пракуратуры Берасцейскай вобласці стала вядома, што на суд прывялі «асоб прызыўнога ўзросту». Дзяржабвінаваўцам выступаў пракурор Івацэвіцкага раёна Раман Гузюк, прозвішча суддзі пачынаецца на літару К.

«У судовым пасяджэнні абвінавачаны ўказаў, што прызнае віну цалкам, але фактычна віну не прызнаў», напісана ў судовай пастанове.

Пры вынясенні прысуду суддзя кіраваўся арт.39 Закона «Аб воінскім абавязку і воінскай службе». Таму пазіцыю Барыса аб яго стане здароўя, умовах для знаходжання ва ўстанове аховы здароўя ніяк не ўлічылі. Згодна з законам, хлопец быў абавязаны атрымаць накіраванне ва ўказаную ўстанову аховы здароўя, прыбыць туды і праходзіць там абследаванне. Аднак Барыс наўмысна адмовіўся ад праходжання ўказаных мерапрыемстваў па набору на воінскую службу.

Пры вынясенні прыгавору суддзя ўлічваў «асобу абвінавачанага — наяўнасць сталага месца жыхарства, адсутнасць судзімасці, у той жа час наяўнасць фактаў шматразовага прыцягнення абвінавачанага да адміністрацыйнай, а таксама яго прыцягненне раней да крымінальнай адказнасці, пасрэдную характарыстыку па месцы пражывання, адсутнасць сталага месца працы».

Суд Івацэвіцкага раёна прызнаў яго вінаватым ва ўхіленні ад мерапрыемстваў па наборы на вайсковую службу і прызначыў два месяцы арышту.