Туск: «Ценявы флот» Расеі ў Балтыйскім моры трэба нейтралізаваць

Гэтыя караблі нелегальна перавозяць расейскую нафту.

Прэм'ер Польшчы Дональд Туск мяркуе, што перамяшчэнне ў Балтыйскім моры "ценявага флоту" Расеі, які нелегальна перавозіць расейскую нафту, трэба спыніць, у тым ліку шляхам умяшання на ўзроўні Еўракамісіі.

Пра гэта Туск сказаў падчас супольнай прэс-канферэнцыі з прэм'ерам Даніі Мэтэ Фрэдэрыксэн у панядзелак у Варшаве, яго цытуе «Укрінфарм».

Туск паабяцаў зрабіць "усё магчымае", каб падтрымаць намаганні Фрэдэрыксэна і каб Еўракамісія спыніла перамяшчэнне караблёў з расейскай нафтай.

"Гэта павінна быць еўрапейская пастанова аб спыненні функцыянавання гэтага флоту паводле дэ-факта нелегальнай перавозкі (нафты. - Рэд.), што пагражае экалагічнай бяспецы ў Балтыйскім моры", - падкрэсліў Туск.

Ён паабяцаў, што Варшава не пакіне Капенгаген сам-насам з гэтай праблемай.

Прэм'ер Даніі падкрэсліла, што абедзве краіны "хочуць пазбавіцца ад гэтых расейскіх караблёў, і не важна, ходзяць яны пад расейскім сцягам ці не".

На ейную думку, добрай пастановай была б падрыхтоўка на ўзроўні Еўракамісіі рэкамендацый для краін-чальцоў ЕЗ наконт магчымай рэакцыі на гэты флот. Яна дадала, што гэтае пытанне будзе абмяркоўвацца і надалей.

Туск заявіў таксама, што яны з прэм'ерам Даніі казалі аб стварэнні супольнай еўрапейскай сістэмы абароны неба на выпадак вайны.

Ён паведаміў, што Польшча разам з Даніяй плануюць актыўна дапамагаць Украіне і не дапускаюць іншых сцэнароў, акрамя захавання Украіны як незалежнай дзяржавы.