ЗША выправяць Украіне артылерыю і СПА адразу пасля ўхвалення дапамогі Кангрэсам

Пентагон ужо рыхтуецца.

Пентагон рыхтуецца хутка выправіць ва Украіну артылерыю і сістэмы СПА адразу пасля таго, як дапамогу ўхваляць у Палаце прадстаўнікоў і Сенаце ЗША. Пра гэта паведаміла выданне Politico са спасылкай на амерыканскіх чыноўнікаў у пятніцу, 19 красавіка.

Як адзначае выданне, Пентагон рыхтуецца да хуткага зацвярджэння пакету дапамогі Украіне. У той самы час адміністрацыя прэзідэнта ЗША Джо Байдэна не прыняла пастанову, наколькі вялікім будзе транш і якое ўзбраенне ён будзе прадугледжваць. Паводле словаў амерыканскіх чыноўнікаў, якія размаўлялі з журналістамі на ўмовах ананімнасці, пакет дапамогі Украіне можа хутка прайсці «бюракратычную працэдуру пасля прыняцця закона і падпісання яго прэзідэнтам».

«Яны вельмі хутка перададуць гэтую рэкамендацыю дзяржсакратару, і неўзабаве пасля гэтага яна трапіць да прэзідэнта», – сказаў адзін з чыноўнікаў.

Таксама чыноўнік дадаў, што шмат амерыканскай зброі размешчана на складах па ўсёй тэрыторыі Еўропы і адтуль яе можна хутка выправіць ва Украіну.

Прадстаўнік Пентагона Патрык Райдэр сказаў журналістам, што ў ЗША ёсць «вельмі магутная лагістычная сетка, якая дазваляе вельмі хутка перамяшчаць матэрыяльна-тэхнічныя сродкі».

«Мы, безумоўна, разумеем і цэнім тэрміновасць і гатовыя дзейнічаць хутка», – сказаў Райдэр.

Politico дадала, што памочніца кіраўніка Пентагона ў пытаннях міжнароднай бяспекі Селеста Валандэр заяўляла, што ЗША пачнуць хуткае перамяшчэнне боепрыпасаў, артылерыйскіх снарадаў і сродкаў супрацьпаветранай абароны, як толькі Кангрэс канчаткова ўхваліць гэтую дапамогу.