24 траўня 2024, Пятніца, 3:55
Падтрымайце
сайт
Сім сім,
Хартыя 97!
Рубрыкі

У Беларусі чэкістамі затыкаюць усе дзіркі

15
У Беларусі чэкістамі затыкаюць усе дзіркі

Выхадцы з КДБ дабраліся нават да цырка.

Камітэт дзяржбяспекі даўно стаў кузняй кадраў для правадыра, але пасля пратэстаў 2020 года складваецца ўражанне, што Аляксандр Лукашэнка спрабуе заткнуць чэкістамі ўсе дзіркі.

Чым зараз кіруюць выхадцы з КДБ? Пра гэта піша "Салiдарнасць".

Сувязь і тэхналогіі

Самы свежы прыклад - прызначэнне кіраўніком мабільнага аператара МТС Уладзіміра Козыра, былога начальніка ўправы КДБ Менску і Менскай вобласці.

Летась кіраўніком сакратарыята наглядальнай рады Парку высокіх тэхналогій стаў Аляксандр Базанаў, былы прэс-сакратар Камітэта дзяржбяспекі. А ўладальнікам кампаніі GameMod, якая ўваходзіць у ПВТ, з'яўляецца былы кіраўнік прэс-службы КДБ Дзмітрый Пабяржын.

Ужо больш за 10 гадоў гендырэктарам правайдэра кабельнага тэлебачання "Космас ТБ" працуе Вадзім Зайцаў, былы кіраўнік КДБ.

Прадпрыемствы і арганізацыі

Распаўсюджанай з'явай у лукашэнкаўскай Беларусі стала прызначэнне чэкістаў намеснікамі на буйныя і важныя прадпрыемствы і арганізацыі для кантролю за работнікамі і кіраўніцтвам. З 2020 года выхадцы з КДБ актыўна праводзяць чысткі, шукаючы іншадумцаў і пазбаўляючыся ад іх.

Адзін з прыкладаў такой кадравай пастановы - прызначэнне ў 2021 годзе былога намесніка старшыні КДБ Алега Чарнышова намеснікам старшыні Нацыянальнай акадэміі навук.

Чэкіст ёсць і ў кіраўніцтве Белтэлерадыёкампаніі. Адным з намеснікаў старшыні там працуе Андрэй Іванец.

Памочнікі Лукашэнкі

Чэкісты прыглядаюць не толькі за дырэктарамі і працаўнікамі прадпрыемстваў, але і "губернатарамі". У 2020 годзе былы кіраўнік КДБ Валерый Вакульчык стаў памочнікам прэзідэнта-інспектарам Берасцейскай вобласці.

А ў 2021-м намеснік старшыні Камітэта дзяржбяспекі Уладзімір Калач быў прызначаны памочнікам прэзідэнта-інспектарам Менскай вобласці.

Сілавыя ведамствы

Лукашэнка любіць затыкаць чэкістамі дзіркі ў іншых сілавых ведамствах. Пару месяцаў таму кіраўніком Дэпартамента фінансавых расследаванняў (ДФР) Камітэта дзяржкантролю ён зрабіў Андрэя Самбука, былога начальніка следчай управы КДБ.

Яшчэ адзін былы кіраўнік следчай управы КДБ Дзмітрый Гара ўжо некалькі гадоў кіруе Следчым камітэтам РБ.

“Палатка”

Былы першы намеснік старшыні КДБ Ігар Сяргеенка нядаўна быў "абраны" "старшынём" "ніжняй палаты парламента".

У новым складзе “палаткі” ёсць і іншыя надзейныя з пункту гледжання Лукашэнкі вушы і вочы. Былы намеснік начальніка ўправы КДБ Гарадзенскай вобласці Андрэй Анісімаў "абраўся" ад Гродзенска-Ленінскай акругі №51, а былы намеснік начальніка ўправы КДБ Берасцейскай вобласці Андрэй Крупенькін - ад Берасцейскай-Памежнай акругі №4.

Пошта, аб'яднанне паляўнічых, цырк

Часам выхадцаў з Камітэта дзяржбяспекі адпраўляюць на кіроўныя пасады ў самыя нечаканыя месцы. Напрыклад, згаданы дэпутат Анісімаў кіраваў у Гародні "Белпоштай".

Летась былога супрацоўніка цэнтральнага апарата КДБ Міхаіла Глушакова прызначылі дырэктарам Нацыянальнага гістарычнага архіва.

Былы начальнік следчай управы КДБ і кіраўнік МУС Ігар Шуневіч ужо некалькі гадоў кіруе Беларускім аб'яднаннем паляўнічых і рыбаловаў (БТПР).

І нават Беларускім дзяржаўным цыркам ужо больш за 10 гадоў кіруе былы чэкіст Уладзімір Шабан

Напісаць каментар 15

Таксама сачыце за акаўнтамі Charter97.org у сацыяльных сетках