У пятніцу ў менскіх парках запрацуюць атракцыёны

Што зменіцца ў новым сезоне?

Заўтра, 26 красавіка, у Менску пачнуць працаваць атракцыёны і фантаны. Пра гэта паведамілі журналістам на спецыяльнай прэс-канферэнцыі «Менскзелянбуда». Вось што зменіцца ў новым сезоне.

Па-першае - запрацуюць новыя атракцыёны. У парку Чэлюскінцаў пасля працяглага рамонту зноў стане даступная папулярная раней «Катальная гара», а да сярэдзіны сезона з'явіцца і зусім новы атракцыён пад назвай «Мікс». Да сярэдзіны сезона абяцаюць адкрыць у Каменнай Горцы парк імя Уга Чавеса. «Вальс», «Аўтадром», «Лабірынт», «Дзіцячы прагулачны цягнік» ужо ўсталяваныя, чакаецца з'яўленне яшчэ чатырох атракцыёнаў, піша «Онлайнер».

Усяго ж у беларускай сталіцы знаходзяцца 66 атракцыёнаў: 25 водных горак і 29 стацыянарных і 12 перасовачных механізаваных атракцыёнаў. За адзін дзень сезона іх наведваюць блізу 19 тысяч чалавек, за ўвесь сезон - амаль два мільёны.

Цэны атракцыёнаў у парках сталіцы не зменяцца і агулам складуць 2,5 рублі за сеанс. Затое крыху зменіцца графік працы. Выходнымі ў Цэнтральным дзіцячым парку ім. Горкага і парку Культуры і адпачынку імя Чэлюскінцаў стануць панядзелак і аўторак, парк 900-годдзя Менска будзе закрыты ў панядзелак, аўторак і сераду. У будныя дні атракцыёны працавацьмуць з 11:00 да 21:00, а ў пятніцу, суботу і нядзелю, а таксама ў перадсвяточныя і святочныя дні - з 11:00 да 22:00.