«Ад Лукашэнкі за вярсту нясе нафталінам»

Генсак, які з цяжкасцю чытае па паперцы трыццаты шрыфт, васковыя постаці - яны самі сябе разваляць

24-25 красавіка адбылося пасяджэнне так званага «ўсебеларускага народнага сходу». Ягоным старшынём быў «абраны» Лукашэнка.

Палітолаг Анатоль Котаў у каментары UDF адзначыў, што пасля пасяджэння УНС у яго засталося ўражанне дэжавю.

«Нармальныя краіны рухаюцца наперад, укараняюць сучасныя практыкі кіравання, будуюць новыя тыпы камунікацый з грамадзянамі, заснаваныя на гарызантальных сувязях.

А тут вяртанне да самых дрымучых савецкіх практык, якія нельга было назваць эфектыўнымі яшчэ ў мінулым стагоддзі. Вынікам дзейнасці такіх фасадных і грувасткіх структур стала з'яўленне асобай касты вышэйшай наменклатуры, якая сябе нядрэнна адчувала на фоне агульнай беднасці дзякуючы доступу да спецабслугоўвання. Грамадзяне былі роўныя ў сваёй беднасці, а дзяржава ў выніку распалася.

Генсакі, якія з цяжкасцю чытаюць па паперцы трыццаты шрыфт, васковыя фігуры ў прэзідыуме. Яны самі сябе разваляць», - мяркуе Котаў.

Ён дадаў:

«Гэта, калі пра ўражанні. А думак бессэнсоўнай імпрэзы, ад якой за вярсту нясе ладанам і нафталінам, выклікаць не можа».

Аб чым можа сведчыць зацверджаны склад кіраўніцтва УНС?

«Ва УНС Лукашэнка хоча стварыць яшчэ адно блізкае кола. Больш даверанае і ўплывовае, чым адміністрацыя ці ўрад. Відавочна, што ён вызначыў фаварытаў, у лік якіх увайшоў Косінец як стары правераны баец, так і два адносна новыя ў абойме чалавекі (Каранік і Шулейка). Таксама можна сказаць, што Лукашэнка для сябе вызначыў галоўным у плане геаграфіі захад Беларусі. Гэта і найбагацейшыя рэгіёны, і найменш лаяльныя. Роўна, як у карціне свету Лукашэнкі, яшчэ і танканебяспечныя. Увядзеннем у прэзідыум ён падкрэсліў асаблівы статус гэтых асоб, цяпер яны крыху раўнейшыя за іншых губернатараў і памочнікаў», – мяркуе Котаў.

Ці стала зразумела з пасяджэння, якую ролю УНС будзе адыгрываць у палітычнай сістэме Беларусі?

«Вырашаючы адну праблему - свайго ўласнага палітычнага транзіту, шляхам стварэння вось гэтага «хурала» з сабой на чале, Лукашэнка стварыў іншую. УНС па-за фарматам рытуальных збораў раз на год ці некалькі гадоў, грувасткі і непаваротлівы орган. Для самой сістэмы гэта не стабілізуючы фактар, чужародны элемент, які будзе яе развальваць знутры. Асабліва, калі прэзідэнцкае крэсла давядзецца перадаць камусьці іншаму. Дыктатуры дрэнна пераносяць спробы самарэфармавання ў тым ліку», - адзначыў Котаў.