Пад Менскам прадаюць сапраўдны палац

Ім некалі валодалі Агінскія, Манюшкі і Ваньковічы.

Пад Менскам прадаюць сапраўдны палац. Прычым, не руіны (хоць яны там таксама ёсць), а часткова адрэстаўраваны будынак без унутранага аздаблення. Размова аб палацава-паркавым ансамблі ў гарадскім пасёлку Смілавічах. Realt распавёў, што гэта за будынак і колькі ён зараз каштуе.

Размешчаны палацава-паркавы комплекс у пасёлку Смілавічах Чэрвеньскага раёна Менскай вобласці. Ад МКАД да гэтых месцаў - менш за 30 кіламетраў. Палац, які дайшоў да нашых дзён, будаваўся і пашыраўся ў розныя перыяды часу.

Першы Смілавіцкі палац у пачатку XIX стагоддзя тут пабудаваў Станіслаў Манюшка - дзед будучага вядомага кампазітара. Цікава, што Станіслаў Манюшка не быў уладальнікам маёнтка. Першапачаткова ён вёў справы на землях Агінскіх як арандатар, але здолеў узняць рэнтабельнасць фальваркаў і стаў уласнікам. На жаль, зараз ад старога будынка засталіся руіны і замкавая вежа з абарончымі зубцамі.

Далейшым будаўніцтвам і пашырэннем палаца займаўся Аляксандр Манюшка. Новы палац пабудавалі побач са старым. Сканчаў работы ў 1900 годзе зяць Манюшкі – Лявон Ваньковіч.

Новы палац быў пабудаваны ў стылі нэаготыкі з элементамі мадэрну. Прастакутны двухпавярховы будынак ускладнілі пяціграннымі эркерамі, а парадны ўваход упрыгожылі вежы са шпілямі.

Канчатковае аблічча Смілавіцкага палаца дапоўніла галерэя, якая злучыла новы і стары палацы. У старой частцы будынка размясцілі бальную залу з крыштальнымі люстрамі і більярдавую. У новай частцы - збор карцін, вялікую бібліятэку, збор старажытных рукапісаў і архівы ўсіх родаў, якія валодалі гэтымі землямі: Агінскіх, Манюшак і Ваньковічаў.

Пасля рэвалюцыі палацава-паркавы комплекс нацыяналізавалі, а былы палац стаў корпусам сельскагаспадарчага тэхнікума. У савецкі час палац некалькі разоў перабудоўваўся, а да пачатку 2000-х пачаў трухлець і апусцеў. У выніку, тагачасны ўласнік будынкаў (Мінсельгасхарч) пастанавіў прадаць пабудовы з аўкцыёну. Пакупніка на палац знайшлі, хаця і не з першай спробы. Вядома, што новым уладальнікам гістарычнай спадчыны блізу 10 гадоў таму стала прыватная кампанія.

За мінулыя гады інвестар правёў у комплексе значную работу: знёс старыя савецкія прыбудовы, ачысціў усе памяшканні ад смецця, выканаў вялікі аб'ём чарнавых работ. Цяпер у палацы ёсць усе камунікацыі, святло і газ. Пры гэтым цалкам скончыць рэканструкцыю прыватнай кампаніі так і не ўдалося. Сёння пабудова ў значна больш прэзентабельным (чым 10 гадоў таму) выглядзе выстаўленая на продаж.

Плошча цаглянага будынка са статусам «няскончаная» складае 1142 квадратныя метры. У цагляным доме - блізу 30 памяшканняў і чатырохметровыя столі. Разам з гістарычнымі пабудовамі новы ўласнік атрымае і надзел 3,5 гектара. На ім, дарэчы, размешчаны помнік прыроды мясцовага значэння - парк Смілавічы.

Атрымліваецца, што патэнцыйны гаспадар палаца атрымае ва ўладанні новы палац, руіны старога палаца, фрагмент агароджы з брамай і парк.

Аб тым, як можна будзе выкарыстоўваць пабудову і зямлю, у аб'яве не паведамляецца. Пры гэтым мэтавае прызначэнне зямлі - для абслугоўвання гісторыка-культурнай каштоўнасці «Палацава-паркавы ансамбль». Хутчэй за ўсё тут можна будзе адкрыць нейкі турыстычны комплекс.

Кошт палаца ў Смілавічах - 1,15 мільёна даляраў. Ён прадаецца праз агенцтва нерухомасці.