Польшча падала заяўку на размяшчэнне ядзернай зброі NATO

Раней прэзідэнт Польшчы заявіў аб гатоўнасці размясціць ядзерную зброю на тэрыторыі краіны.

Польшча зрабіла афіцыйны запыт на размяшчэнне ядзернай зброі NATO, паведаміў намеснік міністра нацыянальнай абароны рэспублікі Павел Залеўскі ў эфіры TVP. Ён удакладніў, што размова ідзе аб заяўцы на ўдзел у праграме Nuclear sharing. Раней да яе далучыліся Бельгія, Італія і Нямеччына.

«Польшча таксама заявіла аб сваёй гатоўнасці ўдзельнічаць у гэтай праграме. І гэтая заява не была адкліканая», - адзначыў Залеўскі. Пры гэтым ён нагадаў, што пастанову аб выкарыстанні ядзернай зброі, у выпадку яе размяшчэння ў Польшчы, будуць прымаць амерыканцы.

Раней прэзідэнт Польшчы Анджэй Дуда заявіў аб гатоўнасці размясціць ядзерную зброю на тэрыторыі краіны для ўмацавання абароны ўсходняга фланга NATO. З ягоных слоў, ён абмяркоўваў гэтую тэму падчас візіту ў Вашынгтон. Неабходнасць такога захаду Дуда патлумачыў «мілітарызацыяй» Калінінградскай вобласці і размяшчэннем ядзернай зброі Расеі ў Беларусі.

Аляксандр Лукашэнка наўпрост заяўляў, што атрыманыя ў Масквы ракеты могуць быць накіраваныя супраць Польшчы, якую ён абвінаваціў у планаванні ўварвання на тэрыторыю краіны. У нядаўна прынятай вайсковай дактрыне ўлады рэспублікі ўказалі, што будуць расцэньваць як ваенную пагрозу размяшчэнне ядзернай і біялагічнай зброі на тэрыторыі «недружалюбных» суседніх краін, уключаючы Польшчу.

Nuclear sharing - гэта пагадненне ЗША з краінамі-хаўрусніцамі па NATO аб перадачы ў выпадку вайсковай неабходнасці ядзернай зброі з амерыканскіх баз захоўвання. У рамках місіі Паўночнаатлантычнага альянсу ЗША ўжо размясцілі на тэрыторыі еўрапейскіх дзяржаў амаль 150 сваіх ядзерных боегаловак.