Беларусь у чаканні новай дэвальвацыі?

Нацбанк бачыць рызыку.

Пазыкі насельніцтва па банкаўскіх крэдытах на 1 красавіка склалі 21,3877 млрд рублёў. Гэтая сума на 408,5 млн рублёў большая, чым месяцам раней, вынікае са звестак Нацбанку. Насельніцтва актыўна павялічвае пазыкі ў крэдытах на спажывецкія патрэбы і на нерухомасць.

Агульная сума крэдытаў насельніцтва на спажывецкія патрэбы на 1 красавіка склала 7,3965 млрд рублёў. Гэта на 210,3 млн рублёў больш, чым месяцам раней. Для параўнання: за люты гэты паказчык вырас на 144,2 млн рублёў.

Пазыкі па крэдытах на нерухомасць на пачатак мінулага месяца склалі 13, 9423 млрд рублёў. Гэтая сума на 197,9 млн рублёў большая, чым месяцам раней. За люты гэтая запазычанасць вырасла на 139,2 млн рублёў.

Раней Нацбанк таксама заяўляў аб інфляцыйных і дэвальвацыйных рызыках для беларускай эканомікі, якія звязаныя ў тым ліку з тым, што насельніцтва і бізнэс актыўна набіраюць крэдыты. Эксперты таксама бачаць у гэтым рызыкі для нацвалюты.

Нагадаем, на травень Нацбанк прыняў пастанову, праз якую павінны крыху вырасці адсоткавыя стаўкі па крэдытах на нерухомасць. Рэгулятар павысіў разліковыя велічыні стандартнай рызыкі (РВСР) - адсоткавая столь па банкаўскіх крэдытах, у першую чаргу - на нерухомасць.