Мянчанка арганізавала паўнацэннае вяселле за $2700

Вось як уклаліся.

Мянчанка расказала ў сацсетках, як ёй удалося арганізаваць вяселле за месяц, выдаткаваўшы $2700 на ўсё: ад пярсцёнкаў да ўбораў і дэкору рэстарацыі. Дзяўчына падкрэслівае, што гэта быў не проста роспіс, а паўнавартаснае вяселле, няхай і камернае. Маладыя падзяліліся каштарысам, паведамляе «Онлайнер».

Пара расказвае, што спрабавала арганізаваць вяселле тройчы. Планавалі бюджэт $4000—6000, але вясельныя арганізатары казалі, што ўпісацца ў такі бюджэт немагчыма. Маладзёны ўзяліся за справу самі.

Вось колькі каштавалі складнікі свята:

$840 - рэстарацыя;

$720 - уборы для жаніха і нявесты;

$300 - вясельны тэкстыль і дэкор (букет нявесты, кветкі, вазы і падсвечнікі);

$250 - пярсцёнкі;

$205 - напоі;

$130 - фатограф;

$100 - альбомы і кадры Polaroid;

$86 - торт;

$59 - урачыстая рэгістрацыя і зала для першага келіха;

$20 - зборы маладых (макіяж, укладка, барбершоп).

Разам $2710. Тым, хто збіраецца паўтарыць досвед, дзяўчына нагадвае пра ўтоеныя выдаткі: таксоўкі, дастаўкі, чаявыя, манікюр па-за графікам.