Як беларусам самастойна атрымаць візу ў Польшчу паводле новай схемы

Расказалі ў турагенцтве.

Тураператар беларускага турыстычнага агенцтва «Зебра» запісала карысны ролік аб працы польскага візавага цэнтра, які змяніў сістэму верыфікацыі з 4 красавіка.

«На здзіўленне сістэма працуе. З перабоямі, але ўчора і сёння многія сапраўды змаглі запісацца», - распавяла тураператарка.

З яе слоў, змены закранулі некалькі момантаў.

Так, зараз пры самастойным афармленні візы беларусам для таго, каб увайсці на старонку, трэба набраць пароль на клавіятуры, якая з'яўляецца на экране. Пасля гэтага на электронную пошту павінен прыйсці пароль, які таксама трэба ўвесці ў патрэбнае поле.

Тураператарка заўважыла, што аперацыя з першага разу можа і не атрымацца, бо пароль прыходзіць цягам 10 хвілін, а яго «тэрмін дзеяння» ўсяго толькі 5 хвілін.

Пасля таго, як карыстач увядзе свае пашпартныя звесткі, ён патрапіць на старонку верыфікацыі, дзе трэба будзе паказаць на камеру свой пашпарт і зрабіць сэлфі.

Пасля ўсіх праведзеных аперацый карыстач пяройдзе на старонку рэгістрацыі, дзе зможа забраць неабходнае яму месца.