Сакавік стаў дзясятым самым цёплым месяцам запар за ўсю гісторыю назіранняў

Тэмпература паветра і сусветнага акіяна дасягнула рэкорднага ўзроўню.

У сакавіку Зямля дзесяты раз запар устанавіла рэкорд. Чарговы месяц стаў самым цёплым за ўсю гісторыю назіранняў, а тэмпература паветра і сусветнага акіяна дасягнула рэкорднага ўзроўню, паведаміла еўрапейская кліматычная служба Copernicus.

Паводле інфармацыі кліматолагаў, у сакавіку 2024 года сярэдняя тэмпература паветра склала 14,14°C, перавысіўшы папярэдні рэкорд 2016 года на дзясятую долю градуса. Таксама гэты сакавік апынуўся на 1,68°C цяплейшым, чым быў агулам у даіндустрыяльны перыяд у 1850-1900 гадах.

З чэрвеня мінулага года на нашай планеце адбываюцца ўсё новыя рэкорды. Гэтаму спрыяе цяпло, якое зыходзіць з сусветнага акіяна («Эль-Ніньё»). Праўда, у апошні час «Эль-Ніньё» працягвае слабець ва ўсходняй экватарыяльнай частцы Ціхага акіяна, але тэмпература марскога паветра агулам заставалася на незвычайна высокім узроўні, праз што зноў быў пабіты тэмпературны рэкорд.

Пры гэтым кліматолагі звязваюць большую частку рэкорднага цяпла з уздзеяннем чалавека на клімат. Напрыклад, з выкідамі вуглякіслага газу і метану, якія ўтвараюцца пры спальванні вугалю, нафты і прыроднага газу. З іх слоў, сітуацыя не зменіцца, пакуль канцэнтрацыя парніковых газаў у атмасферы не перастане расці. Гэта азначае, што трэба спыніць спальваць выкапнёвае паліва і высечку лясоў.

Дадамо, што мінулы люты таксама стаў самым цёплым за ўсю гісторыю назіранняў. Тэмпература паветра ў тым месяцы была на 1,77°C вышэйшай, чым у даіндустрыяльную эпоху (1850-1900 гады). Ён стаў дзявятым месяцам запар, які выявіўся самым цёплым у гісторыі. Акрамя таго, люты 2024-га стаў самым цёплым за апошнія больш за 30 гадоў.

Раней навукоўцы далі прагноз, што 2024 будзе вельмі гарачым, прычым настолькі, што, на іх чаканні, ён перасягне 2023-і, які раней назвалі самым гарачым у гісторыі чалавецтва.