У найбуйнейшым горадзе Казахстана забаранілі шэсце ў гонар 9 траўня

Другі год запар.

Улады Алматы не дазволілі праводзіць шэсце ў 79-ю гадавіну перамогі ў Другой сусветнай вайне, паведаміў старшыня казахстанскай рады грамадскіх аб'яднанняў ветэранаў і інвалідаў вайны ў Афганістане і іншых ваенных канфліктаў Мурат Абдушкураў, піша The Moscow Times.

Паводле ягоных слоў, аналаг «Бяссмертнага палка» пад назвай «Батырларга тагзым» («Паклонімся героям») планавалася правесці 9 мая. Аднак мэрыя Алматы адмовілася ўзгадніць мерапрыемства, спаслаўшыся на «неспакойнае становішча ў свеце», верагоднасць правакацый і цяжкую паводкавую сітуацыю ў краіне.

«Акімат (мэрыя) хоча перастрахавацца», – сказаў Абдушкураў РІА «Новости», дадаўшы, што гэта адбываецца ўжо другі год запар. У сувязі з гэтым акцыя пройдзе ў онлайн-фармаце і працягнецца да 22 чэрвеня. У рамках яе прапануецца размясціць фота і біяграфіі ўдзельнікаў Другой сусветнай вайны на інтэрнет-пляцоўках і ў сацсетках грамадскіх аб'яднанняў ветэранаў Казахстана.

Са звестак акімата Алматы, у горадзе пражываюць 44 ветэрана ВАВ. Сёлета яны атрымаюць аднаразовую выплату да Дня Перамогі сумай 2 млн тэнге на кожнага ($4,5 тысячы).

Раней паведамлялася, што Казахстан адмовіўся праводзіць вайсковы парад падчас святкавання Дня абаронцы Айчыны 7 траўня і Дня Перамогі 9 траўня. Мерапрыемства не адбудзецца «з разліку эканоміі бюджэтных сродкаў», а таксама «ў сувязі з неабходнасцю развязання іншых задач», растлумачылі ў Мінабароны краіны.

У 2023 і 2022 гадах улады Казахстана надумалі не праводзіць парад у гонар Дня Перамогі з той жа прычыны. У Мінабароны адзначалі, што адно такое мерапрыемства ў сярэднім каштуе бюджэту больш за 4 млрд тэнге. Апошні парад на 9 траўня ў Казахстане прайшоў у 2019 годзе.