Амерыканскі рынак акцый абнавіў рэкорд

У рынку з'явіліся спадзяванні на зніжэнне стаўкі ФРС.

Амерыканскія фондавыя індэксы ўстанавілі новыя ўнутрыдзённыя рэкорды. Індэкс S&P 500 вырас на 0,88% да 5293,15 пунктаў, сведчаць звесткі на 18:34 паводле Менска. Індэкс NASDAQ у 18:43 паводле Менска дадаў 1,01%, да 16 678,65 пункта.

Індэкс Dow Jones на максімуме вырас на 0,71%, да 39 842,5 пункта паводле звестак на 18:30 паводле Менску. Гэта максімум з 28 сакавіка.

Амерыканскі фондавы рынак расце пасля публікацыі звестак, якія паказалі паслабленне тэмпаў інфляцыі ў краіне, піша Bloomberg. У сераду, 15 траўня, Федэральнае бюро статыстыкі працы ЗША паведаміла, што азначнік спажывецкіх коштаў (CPI) у краіне ў красавіку вырас на 0,3% пасля росту на 0,4% у сакавіку і лютым. У гадавым вылічэнні CPI у красавіку павялічыўся на 3,4% пасля росту на 3,5% у сакавіку.

Апытаныя эканамісты Reuters прагназавалі, што індэкс спажывецкіх коштаў вырасце на 0,4% за месяц і на 3,4% у гадавым вылічэнні. Агенцтва Dow Jones таксама меркавала, што за месяц CPI вырасце на 0,4%, паведамляе CNBC.

«Навіны пра базавую інфляцыю былі лепшыя, чым чакалася. Звесткі пра раздробны продаж таксама паказалі некаторае запаволенне ў параўнанні з раней актыўным спажывецкім сектарам», – цытуе Bloomberg кіроўнага дырэктара CIBC Private Wealth US Гэры Пзегеа. Паводле ягоных словаў, такія звесткі пра інфляцыю ўзмацняюць надзею на зніжэнне стаўкі ФРС.

Аднак у Regan Capital мяркуюць, што да таргету ФРС у інфляцыі на ўзроўні 2% яшчэ далёка. «Эканоміка застаецца моцнай, таму нам спатрэбіцца яшчэ некалькі слабых паказнікаў інфляцыі, каб даць ФРС зялёнае святло на зніжэнне ставак», – мяркуе кіроўны эксперт Regan Capital Скайлер Вейнанд.

Разам з ростам рынку акцый, адзначае Bloomberg, да самага высокага ўзроўню з пачатку красавіка ўзняліся аблігацыі. Прыбытковасць двухгадовых казначэйскіх аблігацый упала на сем базісных пунктаў, да 4,75%.

Паводле вынікаў апошняга пасяджэння 1 траўня ФРС зноў пакінула стаўку на ўзроўні 5,25–5,5% гадавых. Рэгулятар адзначыў, што няма мэтазгоднасці скарачаць мэтавы дыяпазон да таго часу, пакуль не будзе большай упэўненасці ва ўстойлівым набліжэнні інфляцыі да 2%.