Рынак працы ў Беларусі трасе

Улады Менска, у якім дэфіцыт работнікаў, зазываюць кадры на буйны завод у рэгіёне.

На «Гродна Азот» – нястача працаўнікоў. Прычым прадпрыемства надумала шукаць кадры вельмі нечаканым спосабам - праз тэлеграм-канал Менгарвыканкама. І гэта пры тым, што ў сталіцы таксама нарастае дэфіцыт працаўнікоў.

Журналісты zerkalo.io паглядзелі, у якіх кадрах мае патрэбу гэты гарадзенскі завод і якія заробкі абяцаюць.

"Гродна Азот" шукае амаль 750 работнікаў, вынікае з банка вакансій. Прамысловы гігант мае патрэбу ў работніках абсалютна розных спецыяльнасцяў і кваліфікацыі - ад майстра ў цэх да галоўнага бухгалтара. Для параўнання: у канцы красавіка 2022 года на гэты завод патрабавалася 113 супрацоўнікаў.

Характэрна, што ўсе прапановы аб працы ў банку вакансій былі размешчаны 10 траўня - менш чым праз месяц пасля скандалу з узломам «Кіберпартызанамі» сістэм прадпрыемства.

Заробкі на заводзе прапануюць даволі розныя. Так, прадпрыемству патрэбны сем апаратчыкаў выцяжкі, якім гатовы плаціць ад 650 да 1000. І гэта да выплаты падаткаў. Вогнеўпоршчыку прапануюць заробак 947 рублёў за месяц пры працы на стаўку. Электраманцёру ў выпрабаваннях і вымярэннях - ад 948 да 1600 рублёў. У абодвух выпадках можна жыць у інтэрнаце завода.

Машыніст помпавых установак можа мець за месяц 1377-1656 рублёў і жыллё ад наймальніка. Даволі вялікая розніца ў заробку для эканаміста ў збыце: ад 1200 да 1800 рублёў. Зрэшты, як бачым, у кожным выпадку ён не дацягвае да сярэдняга ў краіне. Інжынеру-праграмісту будуць даваць заробак сумай ад 2170 да 2325 рублёў, плюс месца ў інтэрнаце.

Ёсць і прыстойныя фінансавыя прапановы. Напрыклад, маркетолагу з пяцігадовым стажам працы прапануюць 4 300 рублёў і пакой у інтэрнаце. Намесніку начальніка аддзела гатовы плаціць 4 233-5 291 рублёў брута (гэта значыць да выплаты падаткаў). Вядучага бухгалтара хочуць "купіць" за 2 775 рублёў за месяц. У гэтым выпадку таксама аддаюць перавагу інтэрнату. А галоўнаму бухгалтару хочуць плаціць менш - 2137 рублёў.

«Гродна Азот» перастаў даваць справаздачу перад грамадскасцю аб сваіх фінансавых справах, таму няма дакладных звестак аб актуальнай колькасці супрацоўнікаў. Аднак паводле звестак на 2020 год там працавала 7 475 чалавек. Калі зыходзіць з гэтай інфармацыі, выходзіць, што зараз дзель новых работнікаў, якіх хочуць наняць, складае больш за 9% ад штата завода.