На акупаванай тэрыторыі Украіны збіраюцца вырабляць беларускія трактары

Падрабязнасці.

Паводле інфармацыі расейскага агенцтва ТАСС, на тэрыторыі часова акупаванай Запарожскай вобласці Украіны плануюць запусціць вытворчасць беларускіх трактароў МТЗ.

Аднак перамовы паміж акупацыйнай адміністрацыяй і прадстаўнікамі беларускай стараны, магчыма, ідуць не вельмі паспяхова.

- Цяпер мы вядзём перамовы з беларускімі калегамі аб вытворчасці трактароў "Беларус" у Запарожскай вобласці [Украіны], а затым і аб разгортванні вытворчасці дэталяў да іх на нашых прадпрыемствах, - заявіў прадстаўнік акупацыйных уладаў, "выканаўца абавязкаў міністра прамысловасці і гандлю" гэтага рэгіёну Аляксандр Марчанка.

Пра аналагічныя планы расейцы заяўлялі больш чым паўгода таму.

- Наладжваем супольную вытворчасць буйнавузлавой зборкі трактарнай вытворчасці [маркі] МТЗ-82 з Беларуссю. Вядзём перамовы, - заяўляла ў пачатку кастрычніка мінулага года іншая прадстаўніца акупацыйных уладаў Святлана Шаўчэнка. Тады ж абмяркоўвалася пытанне адкрыцця ў Запарожскай вобласці філіяла Аршанскага мясакансервавага камбіната.