Bloomberg: Нямеччына пагадзілася выкарыстоўваць замарожаныя актывы Расеі на карысць Украіны

Бэрлін зрабіў вызначальны крок.

Улады Нямеччыны надумалі падтрымаць план ЗША ў выкарыстанні даходаў ад замарожаных расейскіх актываў для фінансавання Украіны - для выдачы крэдыту на 50 млрд даляраў. Гэта можа стаць вызначальным крокам, які наблізіць Вашынгтон і яго супольнікаў да выдачы новага істотнага пакета дапамогі краіне, якая зазнала поўнамаштабны напад.

Пра гэта паведамляе Bloomberg. Адзначаецца: чакаецца, што G7 ("Вялікая сямёрка") абмяркуе пытанне ўжо на гэтым тыдні, аднак прыняцце пастаноў не адбудзецца раней за сярэдзіну чэрвеня.

«Нямецкія афіцыйныя асобы гатовыя падтрымаць план ЗША для выкарыстання будучых даходаў, атрыманых ад замарожаных расейскіх актываў для дапамогі Украіне. ...На карту пастаўленае, ці зможа ўкраінскі ўрад заставацца фінансава жыццяздольным да 2025 года», - гаворыцца ў паведамленні.

Пры гэтым падкрэсліваецца: такім чынам прыхільнікі Украіны імкнуцца забяспечыць яе сярэднетэрміновае фінансаванне. А таксама «паслаць сігнал Маскве аб тым, што падтрымка Кіева сярод супольнікаў з G7 не слабее».

Што папярэднічала

Да гэтага на працягу некалькіх месяцаў ЗША спрабавалі выкарыстоўваць замарожаныя актывы РФ для дапамогі Украіне. Прапановы розніліся:

ад поўнай канфіскацыі і перадачы грошай Украіне;

да іх захоўвання для выпуску аблігацый або выкарыстання для забеспячэння той ці іншай формы крэдыту.

Тым не менш, у шэрагу краін яны былі сустрэты са скептыцызмам. Нямеччыне і Францыі, якія выказалі ўстурбаванасць наконт:

іх законнасці;

уплыву такіх крокаў на фінансавую стабільнасць і прывабнасць еўра.