Расея масавана бамбіла ФАБ свае рэгіёны

І акупаваныя тэрыторыі.

За апошнія тры месяцы расейская вайсковая авіяцыя выпусціла 53 ФАБ (фугасныя авіяцыйныя бомбы) на рэгіёны РФ і акупаваныя тэрыторыі Украіны, палічыла ASTRA.

Апошні такі выпадак, паводле інфармацыі выдання, адбыўся 20 траўня — самалёты ВКС скінулі адразу тры авіябомбы на вёскі Круты Лог і Шабекіна ў Белгародскай вобласці.

Да гэтага расейскія бомбы падалі на прадмесце Белгарада ў дзень падзення шматпавярховіка - 12 траўня. Дзве ФАБ-500 упалі на пасёлак Разумнае-54 з розніцай на восем гадзін. Месца падзення бомбаў размешчанае менш чым за 8 км ад дома па вуліцы Шчорса, 55А, у якім у той жа дзень у выніку трапляння боепрыпасу абрынуўся пад'езд. Абедзве ФАБ закапаліся ў зямлю і не разарваліся. Губернатар Вячаслаў Гладкоў неўзабаве заклікаў мясцовых жыхароў эвакуавацца на час правядзення размінавання.

Згодна з падлікамі The Insider, толькі на працягу 2024 года на тэрыторыі Белгародскай вобласці не менш як 39 разоў фіксаваліся няштатныя падзенні расейскіх авіябоепрыпасаў: 38 розных мадыфікацый ФАБ і адной ракеты Ч-59. Як мінімум двойчы ФАБ падалі ў Белгарадзе.

У пачатку гэтага года расейская авіябомба ўпала на сяло Петрапаўлаўка Варонежскай вобласці. З прычыны інцыдэнту, які здарыўся 2 студзеня, пацярпелі чатыры чалавекі, больш за 100 жылых дамоў атрымалі розныя пашкоджанні. Таксама пацярпелі школа, дом культуры, будынак адміністрацыі, пяць легкавых аўтамабіляў і трактар.

Праз усяго некалькі дзён - 8 студзеня - падчас абстрэлу Украіны расейская ФАБ упала на горад Рубежнае ў «ЛНР». Жыхароў найбліжэйшых дамоў экстрана эвакуавалі. Пецярых чалавек, у тым ліку дваіх дзяцей, накіравалі ў пункты часовага размяшчэння, астатнія пераехалі да сваякоў і сяброў.

Падобныя інцыдэнты адбываліся і летась. Так, 20 красавіка 2023-га ў цэнтральнай частцы Белгарада ўзарвалася авіябомба, якую выпусціў на горад расейскі вайсковы самалёт Су-34. У Міністэрстве абароны РФ назвалі тое, што здарылася "няштатным сходам авіяцыйнага боепрыпасу" і прызналі "пашкоджанні жылых будынкаў", не ўдакладніўшы іх колькасць. Таксама вайсковае ведамства паведаміла, што пацярпелых нібыта няма.

Губернатар Гладкоў, аднак, у сваім Telegram-канале напісаў, што ў выніку інцыдэнту пацярпелі як мінімум дзве жанчыны, а "на скрыжаванні адной з цэнтральных вуліц (Ватуціна — Губкіна. — TMT.) утварылася вялізная варонка радыусам 20 метраў". Кіраўнік рэгіёну таксама заявіў аб пашкоджанні жылой інфраструктуры, аўтамабіляў і ліній электраперадач.